الأوقاف: صلاة العيد فرحة من غير عشوائية وتجنبوا الاختلاط

شددت وزارة الأوقاف، على أن صلاة العيد هي فرحة من غير عشوائية، وذلك في إشارة إلى الاختلاط الذي يحدث بين الرجال والنساء في الساحات. 

التحذير من الاختلاط في الساحات 

وقالت الأوقاف في بيان لها اليوم السبت، إن صلاة العيد يوم بهجة وعبادة، بنجتمع فيه على التكبير والتهليل، وده مشهد من مشاهد تعظيم شعائر ربنا، فلازم يكون بالشكل اللائق، زي ما ربنا قال:"ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ" (الحج: 32).

وتابعت: لكن للأسف، بقت بتتكرر مشاهد مش لائقة في صلاة العيد، زي الزحمة الشديدة، والاختلاط العشوائي بين الرجال والنساء، وبعض الناس اللي بتصلي في غير اتجاه القبلة بسبب الزحام.

ونبهت:  «سيدنا النبي ﷺ علّمنا النظام واحترام الصلاة، وده معناه إن الصلاة ليها نظام واضح، ولازم نحترمه عشان نحافظ على روح العبادة والخشوع».

دارالإفتاء تستطلع هلال شوال السبت المقبل وتحذر من الحسابات الفلكية

وزير الأوقاف يتقدم بالتعازي والمواساة لميانمار وتايلاند إثر الزلزال المدمر

وأوضحت:« من الزحمة والعشوائية، ساعات بنلاقي ناس بتصلي في اتجاه غلط! وده خطأ كبير لأن استقبال القبلة شرط لصحة الصلاة، وربنا قال: "فَوَلِّ وَجْهَكَ شَطْرَ الْمَسْجِدِ الْحَرَامِ" (البقرة: 144)».

وأكدت: سيدنا النبي ﷺ قال: "إذا قُمتَ إلى الصلاةِ فأسبغِ الوضوءَ، ثم استقبِلِ القبلةَ فكبِّرْ" (متفق عليه). يعني لازم نهتم إننا نصلي في الاتجاه الصح، وده مش هيحصل إلا لو التزمنا بالنظام وتجنبنا الفوضى.

وزارة الأوقاف حرصت على تجهيز عدد كبير من الساحات والمساجد في كل المحافظات عشان تضمن إن الصلاة تتم في أجواء منظمة، ومن أهم الترتيبات:

✅ أماكن محددة للرجال وأماكن للنساء، فلازم نلتزم بيها.
✅ كل واحد يروح أقرب ساحة ليه بدل ما يتكدس في مكان بعيد بدون داعي.
✅ اتباع تعليمات المشرفين والمنظمين عشان الصفوف تبقى منتظمة والصلاة تطلع بالشكل اللائق.

وشددت صلاة العيد مش مجرد تجمع والسلام، دي عبادة عظيمة لازم نحافظ على قدسيتها. كلنا مسئولين عن نجاحها، فبلاش الزحمة العشوائية، وبلاش الفوضى، ونلتزم كلنا بالنظام اللي هيخلينا نصلي في راحة وخشوع.

استطلاع هلال شهر شوال 

فيما تستطلع دار الإفتاء المصرية مع غروب شمس اليوم هلال شهر شوال وأول أيام عيد الفطر المبارك لعام 2025 ميلادي و1446 هجري.