هايدي بطلة تريند الشيبسي.. طفلة علمت الكبار درسًا في الإنسانية | القصة الكاملة
تداول رواد منصات التواصل الاجتماعي مشاهد بسيطة من قلب الشارع لطفلة صغيرة تدعى "هايدي" لم تسع يدها سوى خمسة جنيهات، لكنها قلبها اتّسع من الرحمة ما يكفي ليوقظ ضمير أمة بأكملها.
كانت هايدي تقف أمام رفوف "الشيبسي" في أحد المحال، اختارت كيسًا كما تفعل أي طفلة في عمرها.. لكن لحظة مرور رجل محتاج بجوارها قلبت الموازين: أعادت كيس الشيبسي، ودفعت ثمنه للغريب دون أن تنتظر شكرًا أو تصفيقًا.
«رجّعت كيس شيبسي وتصدقت بثمنه».. قصة الطفلة هايدي التي أبهرت السوشيال ميديا
فعل إنساني بسيط أشعل السوشيال ميديا، وتحول لـ"تريند"حقيقي عن براءة معهودة فضّلت إسعاد الآخر على نفسها.
يرصد لكم "نيوز رووم" في التقرير التالي ردود الأفعال الواسعة عن الطفلة هايدي التي حركت القلوب قبل الكلمات.
الفنان صبري فواز أشاد ببراءتها عبر صفحته الشخصية قائلًا: "هايدي بنت جميلة وطيبة ومتربية وعملت خير.. المواقع جريت عليهم تصورهم وتعمل معاهم لقاءات.. ودي حاجة كويسة يشكروا عليها".
وأكّد فواز أن جمال القصة في بساطتها حيث قال: الراجل أبو هايدي قال كلمة في منتهى الجمال.. قال للصحفى أنا شايف إنها حاجة عادية.. مفيش أجمل من كده رد.. خصوصا لما يكون طالع من راجل طيب شريف بيعرف يربي.. ليه بقى عاوزين نشده لحواراتنا وترينداتنا وعاوزينه يفتي في حاجات مش بتاعته.. ولا تخصه.. يا جدعان .. سيبوا الناس بجمالها دول آخر حاجة حلوة".
براءة تهز السوشيال ميديا.. هايدي الصغيرة تصنع تريند الخير
وكتب آدم فتحي على صفحته على "الفيس بوك": "الترند اللي يستحق الدعم الطفلة هايدي الجميلة اللي ضربت مثال عظيم في الصدقة وإيثار النفس وحب مساعدة الغير؛ طفلة في عمر صغير علمتنا درس محتاج سنوات عشان الواحد منا يقدر يطبق اللي عملته الطفلة على أرض الواقع برغبه وحب بدون تردد وبدون ما تعرف إن فيه كاميرات بتصور او صفحات تنقل الخبر؛ واللي خلف الكواليس هو الاب والأم اللي ابحثوا وراهم كويس هتلاقوهم ناس في غاية الحب والخير عشان كده خرجت الطفلة من نفس صفاتهم الجميلة".
وأضاف: "الأمثلة اللي زي دي محتاجه تظهر للناس وتُدرس في المناهج صدروا للناس الخير والحب والدين الجميل كفاية علينا الأمثلة السيئة اللي بقالنا زمان بنعاني منها.. شكرا يا هايدي صحيتي فينا إن الخير كل الخير في مساعدة الناس وإن الخير باقي أثره على صاحبه والثواب الجنة".
كريم البحيري كتب: "ونعمة التربية يا هايدي يا بخت والدها عندك بنت تشرف.. أهو انتى أكتر شخص يستحق يبقي ترند".
توفيق محمود كتب: " هايدي طفلة جميلة وبريئة، أهلها عرفوا يربوها.. هايدي لا كانت تعرف إنه في كاميرا بتصورها، ولا إنه حد في يوم ما هيعرف بإللي هي هتعمله دا، ولا كانت مستنية حاجة في المقابل! هايدي كان معاها 5 جنية رايحة تشتري كيس شيبسي، وخدته داخله تحاسب، فلقت راجل محتاج ماشي جمبها.. في تصرف نادر جدا جدا جدا إنه يصدر من طفل، قامت مرجعه كيس الشيبسي، وواخده الـ5 جنيه مدياها للراجل! تصرف ماتتوقعش يصدر من طفل، بيفكر في اللي حواليه قبل نفسه!".
وأضاف: "أتمنى حقيقي الخبر والفيديو بتاعها ينتشر في كل حته، ونوريها لأولادنا كنموذج كويس الناس تشوفه وسط الاشكال التانية اللي بنشوفها في كل حتة دي! صاحب المحل لما شاف الموقف، ندالها يديها كيس تاني! رفضت! أتمنى أولادي مستقبلًا وهما في سنها، يبقى دي اخلاقهم وتصرفاتهم ونضجهم.. شكرًا ليها، وللي رباها، وأتمنى الدولة تقدملها لفتة لطيفة".
وعلق شريف أشرف على تصرف الطفلة هايدي قائلًا: "هايدي طفلة صغيرة بس عملت موقف خلّى الدنيا كلها تتكلم عنها هايدي بقت رمز للخير والبراءة وهي واقفة قدام رف الشيبسي كان ممكن تختار نفسها وتاخد الحاجة اللي بتحبها زي أي طفل في سنها لكنها اختارت تبسط قلب راجل محتاج أكتر الحركة البسيطة دي علمتنا إن الإنسانية مش محتاجة فلوس كتير ولا أفعال ضخمة محتاجة بس قلب صافي وحب حقيقي للناس".
وتابع: "اللي عملته هايدي مش بس لفت نظرنا ده صحانا من غفلة كبيرة وفكرنا إن الخير حوالينا ولسه موجود وإن أوقات البساطة أقوى من أي بطولة طفلة صغيرة علمتنا درس عمره ما هيتنسي متستصغرش أي فعل خير لأن ممكن حاجة بسيطة زي تمن كيس شيبسي تغير يوم كامل في حياة إنسان تاني.. هايدي أثبتت إن البطل مش لازم يلبس كاب أو يمسك سيف البطل الحقيقي هو اللي بيختار الخير حتى لو الطريق الأسهل عكس كده".
