أخبار الفن .. سبب اعتذار الرداد عن سفاح التجمع وهجوم مصطفى كامل على راغب علامة
نشر قسم الفن في موقع "نيوز رووم"، خلال الساعات القليلة الماضية، عددًا من الأخبار المميزة التي ركزت على أبرز أحداث الوسط الفن وأحوال نجومه.
سبب اعتذار حسن الرداد عن سفاح التجمع
ومن بين هذه الأخبار، كشف النجم حسن الرداد سبب اعتذاره عن عدم تقديم بطولة فيلم سفاح التجمع، على الرغم من تحضيره له، حيث ذهب الدور في النهاية إلى النجم أحمد الفيشاوي.
وقال الرداد عن هذا الأمر في لقائه مع كاميرا موقع نيوز رووم : "صديقي المؤلف محمد صلاح العزب كان كلمني علشان أعمل المسلسل ولكني اعتذرت .. ومش معنى إن فنان اعتذر عن عمل وفنان تاني عمله إنه أقل منه أو العمل ده مش حلو .. كل واحد له وجهة نظر في أدواره .. وممكن يبقى الدور حلو أوي بس أنا عايز أعمله وقت تاني أو عندي دور تاني شبهه".
وأكمل حسن الرداد : "القصة ببساطة إن محمد صلاح العزب كلمني علشان سفاح التجمع وبعتلي الورق فقرأته وعجبني .. ثم تعاقد عليه المنتج أحمد السبكي .. وبعدها سمعت إن الفيشاوي هيعمل سفاح التجمع وحد تاني هيعمله .. فحسيت إني مش حابب أعمل الدور ده دلوقتي واعتذرت للعزب والسبكي .. وإن شاء الله الفيشاوي يكسر الدنيا".
هجوم مصطفى كامل على راغب علامة
أما عن أزمة حفل النجم اللبناني راغب علامة في الساحل الشمالي، فشن الفنان مصطفى كامل، نقيب المهن الموسيقية، هجومًا مرة أخرى عليه، وذلك بعد قرار وقف راغب عن الغناء في مصر وتحويله للتحقيق بسبب مشاهد الأحضان والقبلات في حفل الساحل.
وقال مصطفى كامل خلال لقائه مع برنامج ET بالعربي : "راغب علامة كفنان له تقديره عندي .. تحديدًا شعب لبنان بحبه .. لأن لبنان جزء مني .. وكلهم أصدقائي .. وكل الفنانين ليهم معجبات .. وأنا بتصور مع كل المعجبات .. ولكن في فرق بين إن تجيلك سيدة سلوكها مدتني وخلاص وإنك تبادلها نفس السلوك".
وتابع كامل : "شوفنا فنانة كبيرة طلعت رقصت مع راغب وده قولنا عادي .. لكن بعدها فجأة واحدة تانية طلعت حضنت راغب وهو بادلها الحضن .. وبعدها شوفنا واحدة تانية .. ولكن الواقعة الأخيرة أي حد يقلل منها يبقى مش كويس .. لأن راغب باس واتباس واتحضن وحضن".
وواصل مصطفى مؤكدًا رفضه لما فعله راغب علامة في الحفل، حيث قال : "إحنا كفنانين قادرين إننا نقول لمنظمين حفلاتنا إحنا مش عايزين المشاهد دي .. وإن قبلت أسرة راغب علامة ومجتمعه بهذه المشاهد .. فأنا قانون نقابتي وعادات وتقاليد بلدي مش بتسمح بده.. وكل خوفي يا راغب إن بكره فنان تاني يقلدك ويقول اشمعنا راغب ؟ .. ويجي بعده فنان تاني يجود على ده .. طب هنوصل لفين بقى ؟".
عمرو سلامة يدعم اليوتيوبر محمد عبد العاطي
وفي سياق آخر، أعلن المخرج عمرو سلامة دعمه لليوتيوبر محمد عبد العاطي، بعد القبض عليه يوم الأحد الماضي، بسبب نشره مقاطع فيديو خادشة للحياء ومنافية للآداب العامة.
وكتب سلامة عبر حساباته على السوشيال ميديا : "من تجربة شخصية محمد عبد العاطي .. من أكثر الناس اللي عرفتها على المستوي الشخصي مؤخرًا وحبيتهم ودخلوا قلبي .. شخص طيب وجدع ودمه خفيف وابن حلال مصفي".
وتابع : "لغته اللي في ناس مش موافقة عليها وده حقهم .. هي نفس لغته اللي شوفت بعيني مئات الشباب بيسلموا عليه .. وبيقولوله (بنحبك علشان بتتكلم زينا)".
كما انتقد المخرج عمرو سلامة من يفرحون في حبس اليوتيوبر محمد عبد العاطي، حيث كتب : "من حق أي حد يكره طريقته أو يتهمها بتشويه الذوق العام وقيم الأسرة أو يقاطعه .. يرفض يجوزه بنته .. يلعنه في تعليقات على النت .. لو شافه يقوله في وشه بكرهك .. بس فرحة أي حد بنومته في الحجز علشان مجرد شوية كلام حتى لو خارج وفوقيه صوت بطة .. هي فرحة خسيسة .. ربنا يرجعه لحبايبه الكثير قوي بالسلامة".
