حسن الرداد يتحدث لـ "نيوز رووم" عن ابنته وسبب اعتذاره عن سفاح التجمع(فيديو)
كشف النجم حسن الرداد، تفاصيل إصابته في قدمه خلال الفترة الماضية، كما تحدث عن ابنته فادية وسبب اعتذاره عن عدم تقديم فيلم سفاح التجمع رغم بداية تحضيره له.
تمزق في أنكل الرجل
وقال الرداد خلال لقائه مع كاميرا موقع نيوز رووم : "عندي تمزق في أنكل الرجل .. فالمفروض ماأقفش ومامشيش على رجلي لمدة أسبوعين أو تلاتة .. وباخد حقن علشان أعرف أنزل".
مش عارف فادية شكلي أنا ولا إيمي
وعن ابنته فادية، تابع : "سواء الناس بتندهني أبو فادي أو أبو فادية فالاسمين غاليين عليّ أوي .. ولسه مش عارف فادية شكل مين أكتر أنا ولا إيمي .. لأنها لسه صغيرة عندها شهرين وشوية كده ويبدأ شكلها يتغير".
اعتذرت عن سفاح التجمع
أما عن عدم تقديمه لفيلم سفاح التجمع، رد : "صديقي المؤلف محمد صلاح العزب كان كلمني علشان أعمل المسلسل ولكني اعتذرت .. ومش معنى إن فنان اعتذر عن عمل وفنان تاني عمله إنه أقل منه أو العمل ده مش حلو .. كل واحد له وجهة نظر في أدواره .. وممكن يبقى الدور حلو أوي بس أنا عايز أعمله وقت تاني أو عندي دور تاني شبهه".
وأكمل حسن : "القصة ببساطة إن محمد صلاح العزب كلمني علشان سفاح التجمع وبعتلي الورق فقرأته وعجبني .. ثم تعاقد عليه المنتج أحمد السبكي .. وبعدها سمعت إن الفيشاوي هيعمل سفاح التجمع وحد تاني هيعمله .. فحسيت إني مش حابب أعمل الدور ده دلوقتي واعتذرت للعزب والسبكي .. وإن شاء الله الفيشاوي يكسر الدنيا".
تفاصيل فيلم سفاح التجمع
يُذكر أن فيلم سفاح التجمع بطولة الفنان أحمد الفيشاوي، من المقرر انطلاق تصويره يوم 10 أغسطس الجاري، ويشارك بجانب الفيشاوي في بطولته، كل من انتصار وصابرين وسينتيا خليفة، والفيلم تأليف وإخراج محمد صلاح العزب وإنتاج أحمد السبكي.
آخر أعمال حسن الرداد
وكان آخر أعمال النجم حسن الرداد، مسلسل عقبال عندكوا، الذي جمعه بزوجته النجمة إيمي سمير غانم، وعُرض في موسم دراما رمضان الماضي، وهو من نوعية الأعمال الاجتماعية الكوميدية، وتم عرضه في 15 حلقة، وتأليف أحمد سعد والي وعلاء حسن وإخراج علاء إسماعيل وإنتاج أحمد السبكي.
