مريم أمين: "اللي بيرفض الترحم على لطفي لبيب.. محتاج يعيد تفكيره"
تحدثت الإعلامية مريم أمين عن رحيل الفنان الكبير لطفي لبيب، وأثارت نقطة جدلية حول التعليقات التي ظهرت على مواقع التواصل الاجتماعي بشأن الترحم عليه، فقط لأنه ليس على نفس الدين.
"لطفي لبيب يستحق الرحمة والدعاء من كل إنسان"
أشارت مريم أمين خلال برنامجها " اتفقنا " المذاع عبر إذاعة "نجوم إف إم"،إلى أن الفنان لطفي لبيب كانت له رحلة طويلة مع المرض، وعانى بصمت لسنوات، ورغم ذلك ظل محتفظًا بابتسامته وروحه الهادئة، وقالت: "الناس كلها حزينة عليه، الوسط الفني منهار، والقلوب كلها بتدعي له بالرحمة، لأنه إنسان حقيقي، ومواقفه مع الناس كانت عظيمة".
لكنها توقفت عند ظاهرة أثارت استياءها قائلة: "لقيت ناس بتسأل ليه نترحم عليه؟ هو مش من ديننا؟ طب إيه المشكلة؟ هو إنسانيته كانت ناقصة؟".
"عقلية مريضة وفكر متجمد"
وانتقدت مريم هذه الطريقة في التفكير التي وصفتها بـ"الرجعية والمحبطة"، مضيفة: "اللي يفكر بالشكل ده، عنده مشكلة حقيقية في الفهم والتعاطف. الدين مش كده، ولا الإنسانية كده. ده تفكير مشوّه بيشوهنا كمجتمع".
وأردفت: "لو العقلية دي اتشالت من حياتنا، هنكون في مكان تاني. إحنا عندنا فقر في التفكير، فقر في الرحمة، ربنا يشفي العقول دي".
"بعد لطفي لبيب... في فراغ مش هيتعوض"
في ختام كلامها، عبّرت مريم عن شعورها بالحزن والفراغ بعد رحيل لطفي لبيب، معتبرة أنه يمثل نهاية جيل مميز لن يتكرر، وقالت: "أنا بالنسبة لي، بعد حسن حسني ولطفي لبيب، في صفحة اتقفلت آه ممكن يظهر ناس جديدة، بس الناس دي مش هتتعوّض. زيهم مفيش... ودي الحقيقة اللي لازم نعترف بيها".
وفي وقت سابق ،عبرت الإعلامية مريم أمين عن رأيها في قرار منع الفنان راغب علامة من الغناء في مصر، وذلك على خلفية تصرفات وُصفت بأنها تخالف القيم والعادات والتقاليد المصرية في إحدي حفلاته بالساحل الشمالي.
وقالت خلال منشور عبر حسابها الرسمي على موقع "فيسبوك"، قائلاً: راغب علامه مين اللي يتمنع من الغناء في مصر، اعتقد كان فيه مليون طريقه و مليون أسلوب … نتعامل بيهم مع الفنانين الكبار … اللي الواحد بينسى انهم مش مصريين من كتر ما عاشوا معنا و عيشنا معاهم… احلى ايامنا".
