سها الجندي: تطبيق المصريين بالخارج كان بداية الرقمنة|فيديو

كشفت السفيرة سها الجندي، وزيرة الهجرة السابقة، عن كواليس الفترة الأخيرة لها في المنصب، مؤكدة أنها عملت حتى آخر لحظة قبل صدور قرار إلغاء الوزارة، وسعت لإنهاء كل الملفات العالقة بدافع المسؤولية وحب الوطن.

"اشتغلت لحد الساعة 12 بالليل"

قالت السفيرة سها الجندي  خلال استضافتها عبر برنامج "الستات" المذاع عبر قناة النهار: "أنا لما سمعت خبر إلغاء الوزارة، فضلت أشتغل لحد الساعة 12 بالليل... كنت بحاول أخلص كل حاجة معلقة وأسيب الدنيا مرتبة، وده كان إحساسي بالواجب تجاه كل أسرة مصرية في الخارج... أنا تعهدت لما حلفت اليمين قدام السيد الرئيس إني أكون في خدمة المصريين خارج البلد".

تطبيق رقمي وخدمة 130 جروب واتساب

وأضافت الجندي: "من أهم الحاجات اللي اشتغلت عليها كان تطبيق المصريين في الخارج، وده كان بداية حقيقية لرقمنة الخدمات اللي بتخصهم التطبيق كان المفروض يتم إطلاقه في مؤتمر بعد التعديل الوزاري مباشرة، لكن للأسف التوقيت اتغير. رغم كده، بعتبر إن مجرد التحضير ليه كان خطوة كبيرة على طريق التطوير".

وأشارت إلى أنها كانت تتابع المصريين بالخارج عن قرب قائلة: "أنا مشتركة في حوالي 130 جروب واتساب بتابع من خلالهم مشكلات المصريين في الخارج، من أمريكا لحد الخليج وأستراليا، وده كان بيخليني في الصورة دايمًا، وأقدر أتحرك بسرعة وقت الأزمات".

"ساعدت الطلبة في السودان بروح الأم"

وتطرقت الوزيرة السابقة إلى واحدة من أصعب الفترات التي تعاملت فيها مع المصريين في الخارج قائلة: "وقت أحداث السودان، الأمور حصلت في العيد وفي وسط الإجازات، ورغم كده اتدخلت بنفسي، وساعدت الطلبة اللي كانوا هناك بروح الأم، مش الوزيرة. كنت بحاول أطمنهم، وأسهل رجوعهم لمصر أو تنقلهم لدول تانية للدراسة".

"قرار سياسي وله أبعاد ترشيدية"

وعن قرار إلغاء وزارة الهجرة، قالت السفيرة سها الجندي: "أنا مش عارفة ليه اتلغت، لأن الوزارة دي غاية في الأهمية، وبتخدم قطاع كبير جدًا من المصريين، لكن في رأيي القرار سياسي، وله علاقة بترشيد النفقات، ودمج الوزارات لبعضها".

واختتمت حديثها بالتأكيد على أنها ستظل دائمًا في خدمة المصريين بالخارج من أي موقع كانت فيه، لأن حبها للعمل العام وخدمة الناس مش مرتبط بموقع أو منصب.