لقاء سويدان: حادث كفر السنابسة جرس إنذار لتقصيرنا المجتمعي |خاص
خلال مشاركتها في ندوة فنية أقامها موقع نيوز رووم لتكريمها عن دورها في مسلسل حرب الجبالي، أعربت الفنانة لقاء سويدان عن حزنها العميق تجاه حادث كفر السنابسة الذي أسفر عن وفاة عدد من الفتيات العاملات، مؤكدة أن ما جرى لا يمكن اعتباره "حادثًا عابرًا"، بل "كارثة إنسانية تتكرر".
وقالت سويدان في كلمتها خلال الندوة:" دي مش حادثة عادية خالص.. دي كارثة بكل معنى الكلمة، وبتتكرر للأسف. السنة اللي فاتت حصلت حادثة المعدية في نفس المنطقة تقريبًا، وكانوا بردو بنات رايحين يشتغلوا.. إحنا بنشوف نماذج زي دي كتير جدًا، بنات نازلين من بيوتهم علشان يساعدوا أهاليهم بشرف وباحترام".
دعوة لتوفير فرص العمل بالمناطق الريفية
وطالبت الفنانة الجهات الرسمية والقطاع الخاص بالعمل الجاد لتوفير فرص عمل قريبة من محل سكن الفتيات، لتقليل معاناتهن اليومية في التنقل لمسافات طويلة محفوفة بالمخاطر، قائلة:" المفروض الدولة والقطاع الخاص يشتغلوا على فكرة إن الناس تشتغل في أماكن قريبة.. البنات دول مش نازلين يدوّروا على شهرة ولا رفاهية.. دول خريجات هندسة وتربية وعلوم وتمريض، ونازلين يشتغلوا بشرف.. مش بيسألوا هتدوني كام، ولا في تكييف ولا لأ".
وأضافت بتأثر واضح:" الفرق كبير جدًا بين حد بيجتهد وعايز يشتغل، وبين حد بيتدلّع وهو مش عايز يعمل حاجة إلا بشروط. البنات دي نازلين الشغل من غير أي مطالب.. وعندهم كرامة وحب لأهاليهم، وده معناه إنهم متربيين أحسن تربية".
رسالة للتربية وغرس قيم العمل
واستعادت الفنانة جزءًا من تجربتها الشخصية، مشددة على أهمية غرس قيم العمل والمسؤولية منذ الصغر، فقالت:"أنا شخصيًا اشتغلت وأنا عندي ٨ سنين ونص، وده اللي خلاني دلوقتي إنسانة ملتزمة وعندي إحساس بالمسؤولية. التربية مش بس كلام.. التربية الحقيقية هي اللي بتخلي البنت تنزل تشتغل وهي شايفة إن ده واجب تجاه نفسها وأهلها".
وفي ختام حديثها، وجهت رسالة قوية لكل من انتقد خروج الفتيات للعمل:" اللي بيقول ليه نزلوا يشتغلوا؟ نزلوا يشتغلوا لأنهم متربيين كويس، لأن أهلهم زرعوا فيهم الاعتماد على النفس. مش زي اللي نقعد نقول بنتي أحسن واحدة ومجرد ما أكلمها تبقى ماسكة التليفون ومبتردش".
