رئيس ائتلاف ملاك العقارات القديمة يهاجم نبيلة عبيد بسبب تمسكها بشقتها|خاص
شن مصطفى عبدالرحمن، رئيس ائتلاف ملاك العقارات القديمة، هجومًا على الفنانة الكبيرة نبيلة عبيد، بعد أن أعلنت تمسكها بشقتها الإيجار القديم، وخرجت للبكاء في إحدى التصريحات الإعلامية مؤكدة أنها ستموت لو غادرت تلك الشقة.
رئيس ائتلاف ملاك العقارات القديمة يهاجم نبيلة عبيد
وقال مصطفى خلال فيديو لايف مع موقع نيوز رووم : "اتفاجئنا إن نبيلة عبيد ناشرة إن عندها شقة إيجار قديم في أرقى منطقة في المهندسين .. ولو راحت منها الشقة هتموت .. بس انت فنانة كبيرة وعندك إمكانيات كبيرة".
إدفعي القيمة الإيجارية
وواصل : "في آلاف من الشخصيات العامة بتستحل أموالنا .. ولو عايزة تعمليها متحف إدفعي القيمة الإيجارية .. وقيمة الإيجار تقريبا 30 ألف جنيه .. ولكن انت وخداها بجنيهات .. وانتي لما بتحطي بنزين لعربيتك بيبقى بسعر دلوقتي مش زمان .. وكل الخدمات بتدفعيها بسعر دلوقتي اشمعنا الشقة الإيجار القديم عايزة تعملها مخرن".
شقق الإيجار القديم مش أملاك للعامة
وأكمل مصطفى عبدالرحمن : "والشقق دي مش أملاك للعامة لأ دي أملاك لها ورثة محتاجنها .. ودي رسالة للجميع .. أعمليها مخزن أو أقفليها انت حرة بس إدفعي القيمة الإيجارية .. ولكن أنا دلوقتي كمالك مابقتش مطالب إني أدعم المستأجر بس .. لا دنا بقيت مطالب إني أدفع لذكرياته ودي صورة من صور القهر والظلم اللي بيتعرضله الملاك".
المفروض تبقى نموذج للناس
وتابع : "أنا أناشد الجميع أن يتحمل مسئوليته تجاه هذا الوطن .. والمفروض يا أستاذة نبيلة تبقي نموذج الناس تحتذي به .. وإزاي عايزة تخلي مكان كان فيه ذكرياتك متحف .. ده شئ مستفز جدًا".
نبيلة عبيد تمتلك أكثر من شقة
واختتم مصطفى مهاجمًا نبيلة عبيد، حيث قال : "نبيلة عبيد تمتلك أكثر من شقة لأنها كانت فنانة صف أول ومحتلة السينما ورقم واحد في الفن المصري .. وأكيد كسبت من الفن وربنا يسهلها.. وكنت أتمنى إنها تضرب مثل في الأخلاق العالية وتسيب الشقة للمالك".
سبب تصدر نبيلة عبيد التريند
وكانت قد تصدرت الفنانة نبيلة عبيد التريند مؤخرًا، بعد أن استغاثت بسبب شقتها واعتراضها على إخلائها، حيث قالت في تصريحات لها : "الشقة كانت مملوكة لوالدتي .. وفيها كل ما أملك من أغراض وصور وذكريات وتاريخي السينمائي كله موجود فيها .. بداية من رابعة العدوية و الراقصة والسياسي وكل أعمالي الناجحة".
وتابعت : "أجيب منين مكان أحط فيه كل تعبي ده؟ .. وفني اللي خايفة أرميه بعد كده يبقى على سور الأزبكية .. أنا خايفة على تاريخي مينفعش تترمي".
وأكملت : "أنا بستغيث مينفعش ده تاريخي السينمائي كله في الشقة دي .. ولما بفتحها بشم ريحة نجاحي وريحة أمي فيها .. كل صوري اللي كنت باخدها موجودة في الشقة دي .. ولما بخشها برتاح مقدرش من يوم وليلة يحصل كده .. أنا مجرباها ومجربه اللي أنا فيها دي كانت قدم الخير عليا وبتمنى أرجعلها".
