حمو بيكا ينفي أنباء اعتزاله :مش هبطل غنا لأني مبعملش حاجة غلط وعارف ربنا وبصلي
رد مطرب المهرجانات حمو بيكا، على أنباء اعتزاله الغناء، التي انتشرت بشكل واسع خلال الساعات القليلة الماضية، حيث أكد خلال فيديو لايف عبر صفحته الرسمية على فيسبوك، أنه لن يعتزل مؤكدًا أنه لا يقوم بشئ خاطئ.
حمو بيكا ينفي أنباء اعتزاله الغناء
وقال حمو : "معرفش ليه الخبر ده منتشر .. أنا مبعملش حاجة غلط علشان اعتزل الغناء .. ولما مسحت أغاني أحمد عامر علشان هو في ذمة الله والمفروض مايكنش أغانيه ليها وجود عندي .. وإحنا مبنعملش حاجة غلط .. ده أكل عيشنا وفي فوق الـ 24 أو 26 نفر فاتحين بيوت وبياكلوا عيش من ورانا".
وتابع : "ولو احنا بعمل حاجة غلط أو حرام ربنا هو اللي هيحاسبنا مش عباده .. وفي الآخر كلنا هنموت وكل واحد بيسلم التاني .. والحمد لله إحنا عارفين ربنا كويس وبنصلي .. ومبنعملش حاجة غلط يعني .. وبقول لكل إخواتي بحبكم .. وإحنا وقفنا شغل إمبارح .. ومخدتش شغل خالص في القاهرة .. وبقول لأخويا أحمد عامر ربنا يرحمك ويسامحك .. وكان في أغاني هتنزل وقفتها عشان وفاته لمدة 5 أو 6 أيام".
وأكد حمو بيكا نيته عدم الاعتزال، قائلًا : "ومش هعتزل لأن دي لقمة عيشنا وكلنا أموات ورايحين .. وإحنا مش بنعمل حاجة غلط .. إحنا بنعمل الحاجة اللي بنحبها.. لكن في ناس بتعمل حاجات غلط وبتحب الأذية .. ولكن إحنا ولا بنأذي حد ولا بنيجي على حد .. ولكن إحنا عارفين ربنا كويس ونحمده دايما".
واختتم : "في ناس بتنام بليل لكن إحنا بننام في النهار .. وفي ناس فاكرة إننا مرتاحين لكن إحنا مش مرتاحين .. إحنا ناس بنتعب ونشقى وكافحنا علشان نوصل للي إحنا فيه .. وأنا واحد اشتغلت حاجات كتير عمر ما حد يتخيلها وكلها بالحلال .. والغنا ده حاجة أنا بحبها ومش هبطلها".
مطالبة أحد متابعي حمو بيكا الفنان بالتوبة
يُذكر أن أحد مسئولي صفحة حمو بيكا على فيسبوك، كان قد رد أول أمس الأربعاء ، على مطالبات بعض متابعيه في التعليقات، بالتوبة بعد قراره بحذف الأغاني التي جمعته بمطرب المهرجانات الراحل أحمد عامر، والذي غادر عالمنا صباح الأربعاء الماضي.
رد حمو بيكا على مطالبته بالتوبة
وكان قد كتب أحد متابعي حمو في تعليقه عبر فيسبوك : “جزاك الله خير يا حمو والله .. وطالما إنت أمرت بحذفها فأكيد إنت مقتنع إنها حرام .. فإسمحلي أقولك يأخويا : فكر لعل ربنا يجعل الأمر دا بداية خير ليك إنك تتوب عن المجال دا .. ربنا يتوب علينا وعليك وياخد بإيدك إليه يا صاحبي”، ليرد عليه مسئول حمو بيكا : “قريبة جدًا”.
حمو بيكا يحذف أغانيه مع الراحل أحمد عامر
يُذكر أن حمو بيكا، أعلن مؤخرًا، عبر صفحته الرسمية على فيسبوك، عن حذف جميع الأغاني التي جمعته بمطرب المهرجانات الراحل أحمد عامر، حيث شارك بيكا صورة جمعته بـ عامر.
وعلق بيكا : "تم حذف جميع أغاني أخويا أحمد عامر من على قناتي .. ربنا يرحمك ويغفرلك ويسكنك فسيح جناته.. نتمنى من كل صحاب شركات الإنتاج وكل حد عمل ديو مع أحمد يمسح الأغاني بتاعته.. وربنا يرحمنا برحمته الواسعة ويغفرلنا جميعا”.
