بيومي فؤاد : بعتذر لجمهوري عن أي شئ حدث مني الفترة الماضية
حل الفنان بيومي فؤاد ضيفا في برنامج فضفضت أوي تقديم المخرج معتز التوني وخلال اللقاء اعتذر الفنان بيومي فؤاد لجمهوره ولكل متابعيه، عن أي شيء بدر منه أو أي سوء تفاهم حدث خلال الفترة الماضية.
وقال بيومي فؤاد : لو أنا مزعل أي حد سواء عنده حق أو معندوش.. أنا آسف حقك عليا.. مش بحب أي حد يكون زعلان مني حتى لو فاهمني غلط أو صح.
وعلق بيومي فؤاد على العديد من الموضوعات العملية والشخصية، خلال الحلقة، حيث تحدث عن بداياته الفنية، وقال: اشتغلت ضيف شرف في فيلم دكان شحاتة، كومبارس متكلم، وخالد يوسف كان بيشرحلي وعمرو سعد نايم في المشهد، لقيته فتح عينيه وقالي إزيك يا بيومي.
وتابع بيومي فؤاد: استغربت إنه عارفني لأن أمي لسة متعرفنيش حتى، قال لـ خالد ده يبقى نجم فنون جميلة وكنت بحضرله عروض الكلية زمان.
الحرب العالمية الثالثة
وقال بيومي فؤاد : دوري في الحرب العالمية التالتة كان بتاع صلاح عبد الله واختلفوا ماديا، وقال في حد هييجي يعمل الدور أحسن مني متشيلوش هم.
وأضاف : المخرج أحمد الجندي كان مرتاح أكتر عشان صلاح عبد الله كان هيتبهدل في الدور، وهو مش عايز يبهدله.
وتابع بيومي فؤاد: أنا خدام لقمة عيشي ومش بتدلع لكن بقلب تافه جدا لما التصوير يقف قدام ماتش الأهلي مش هقدر، وإحنا بنصور فيلم وقفة رجالة قالولي وقت الماتش مش هيكون في تصوير وفجأة قالوا هنصور، قولتلهم مش هصور واتفقت مع المخرج نفركش ومشيت.
أحداث فيلم ابن مين فيهم
تدور أحداث “فيلم ابن مين فيهم” في إطار كوميدي اجتماعي، حول شخصية “رشدي” الذي يجسدها الفنان بيومي فؤاد، وهو رجل أعمال ثري ولكنه مستهتر، يتسم بحياة فوضوية قائمة على تعدد العلاقات والزواج المتكرر، دون أي التزام حقيقي تجاه من حوله، يعيش رشدي حياته بتلقائية وأنانية حتى يجد نفسه في مواجهة غير متوقعة مع المحامية الصارمة “ماجدة” التي تؤدي دورها الفنانة ليلى علوي، التي تدخل حياته فجأة وتقلبها رأسًا على عقب.
وتفرض ماجدة، بشخصيتها الجادة والمنضبطة، على رشدي واقعًا جديدًا من خلال مهمة قانونية تجبره على البحث عن ابنه الذي يجهل هويته. وهنا تبدأ رحلة مليئة بالمفارقات الكوميدية والمواقف الساخرة، التي تكشف تدريجيًا عن صراعات داخلية يعيشها رشدي، وتطرح أسئلة عميقة عن المسؤولية، والأبوة، ومعنى العائلة.
