طريقة عمل تيراميسو إيطالي أصلي في البيت على طريقة الشيف نادية السيد
طعمه رهيب ومفيهوش زفارة.. جربي وصفة الـ تيراميسو الإيطالي الكلاسيكي اللي هتاخدك في رحلة نكهات من أول قضمة!وصفة الشيف نادية السيد مش بس سهلة، لكن طعمها هيخطفك فعلًا! جربيها في مناسبة خاصة، أو حتى كتحلية بعد الغدا، وهتكون دايمًا على قائمة الحلويات المفضلة عندك.
البداية: خليط البيض والسكر لازم يفتح ويكون ناعم
في وصفة تيراميسو الإيطالية الأصلية، بنبدأ بخليط البيض مع السكر.
بنضرب الصفار مع السكر كويس جدًا لحد ما اللون يفتح تمامًا، والسكر يدوب خالص، من غير أي حبيبات تتخرز بين إيدينا.
هتلاحظي إن الخليط سخن وناعم وده معناه إنه استوى، ومبقاش فيه أي حاجة ناية.
الجبنة الماسكربوني.. مفيش بديل ليها في الطعم
بنضيف بعد كده 225 جرام من الجبنة الماسكربوني، وده مكون أساسي في التيراميسو.
جبنة كريمية ناعمة، مش ملحة ومش حدّة، وطعمها قريب من القشطة.
بنخلطها بالمضرب اليدوي (أو الهاند بلندر لو حبيتي) مع خليط البيض لحد ما القوام يبقى كريمي وناعم جدًا.
القهوة والفانيليا بدل الكحول
الوصفة الأصلية لـ تيراميسو الإيطالي فيها رم (نوع كحول)، لكن طبعًا إحنا مش هنستخدمه.
استعوضنا عنه بالقهوة الإسبريسو القوية والفانيليا، وهما كفاية جدًا يدوكِ طعم ونكهة مميزة من غير أي زفارة.
عملنا القهوة ببساطة من غير ماكينة، علشان أي حد يقدر يعملها.
صفينا القهوة بمصفاة عادية، أو ممكن باستخدام قطعة قماش مطبخ، علشان نضمن إن مفيش أي رواسب من البن.
كريمة الخفق أو الكريم شانتيه؟ الاتنين ينفعوا
هنحتاج كوب من كريمة الخفق أو ممكن نستخدم الكريم شانتيه الخام.
بنضيف عليه شوية فانيليا، ونضرب بالمضرب الكهربائي لحد ما نوصل لقوام متماسك، شبه قوام الكريم شانتيه المضروب، يمسك نفسه وما يسيلش.
لو استخدمتي كريم شانتيه خام، خدي بالك تقفي على القوام الصح وما تكمليش خفق علشان ما يجلدش أو يفصل.
التجميع: بسكويت، قهوة، كريمة.. ونعيد
بنبدأ نغمس البسكويت (زي الليدي فنجرز) في القهوة بسرعة، ونرصه في الصينية أو الكاسات.
بعد كده نغطي بطبقة من الكريمة، ونكرر الطبقات.
وفي الآخر، بنفرد نص الكريمة المتبقي على الوش بشكل متساوي.
التبريد 8–10 ساعات.. سر الطعم المثالي!
هنا السر الحقيقي لوصفة التيراميسو الناجحة!
لازم يدخل التلاجة من 8 لـ 10 ساعات على الأقل، علشان النكهات تتجانس والبسكويت يشرب القهوة والكريمة تشد نفسها.
بعد ما يبرد كويس، بنرشه بـ كاكاو خام على الوش، ونقدمه بارد ومنعش.
