قبل ما تعملي كيكة أو بيتزا الطاسة.. لازم تعرفي أسرار الشيف أميرة

لكل ست بيت أو بنت بتحب التجديد في المطبخ وبتجرب وصفات كيكة أو بيتزا "الطاسة" اللي بقت ترند على السوشيال ميديا، في حلقة جديدة من برنامج "أميرة في المطبخ" على قناة CBC سفرة، قدمت الشيف أميرة شنب مجموعة من النصائح الأساسية لكل ست بيت أو بنت بتحب التجديد في المطبخ وبتجرب وصفات كيكة أو بيتزا "الطاسة" اللي بقت ترند على السوشيال ميديا.
لكن الحقيقة، مش كل المحاولات بتنجح من أول مرة، والسبب ببساطة هو تجاهل خطوات صغيرة لكنها فارقة،ـ الشيف أميرة كشفت سر النجاح في وصفات الطاسة، بخطوات بسيطة وسهلة.

1. درجة الحرارة الهادية.. السر الأول لنجاح الوصفة

أول وأهم نصيحة من الشيف أميرة كانت:
"درجة الحرارة لازم تفضل هادية طول الوقت، النار العالية بتبوظ كل حاجة."
لو النار عليت، الكيكة أو البيتزا هتتحرق من تحت، ولسه من فوق ناية، علشان كده، لازم تضبطي النار على أقل درجة ممكنة وتصبري لحد ما العجينة تستوي بالتساوي.

2. الطاسة المناسبة بتفرق

من غير طاسة صح، الوصفة ممكن تفشل مهما كانت المكونات ممتازة.
الشيف أميرة أكدت إن لازم تكون الطاسة غير قابلة للالتصاق، زي التيفال أو السيراميك، ويفضل تكون تقيلة مش خفيفة، علشان توزع الحرارة كويس.

وكمان، لازم تدهني الطاسة بزيت خفيف أو زبدة قبل ما تحطي العجينة، علشان ما تلزقش وتطلع معاكِ الكيكة أو البيتزا ناعمة ومنتفخة من غير حروق أو التصاق.

3. التغطية مش رفاهية.. دي خطوة أساسية

كتير بيفكروا إن تغطية الطاسة مجرد اختيار، لكن الحقيقة إنها خطوة أساسية لنجاح الوصفة.

بتقول الشيف أميرة:
"لازم تتغطى، لازم تتغطى. لأن لو ما تغطتش، هتستوي من تحت وتنشف، ومن فوق تفضل سائلة ومش هتعرفي تكمليها."

الغطا بيحبس الحرارة ويخليها تتوزع كويس، علشان السطح ينشف ويتماسك، سواء في الكيكة أو البيتزا.

4. اختبار التسوية؟ بخلة السنان!

مش لازم تفتحي الوصفة كل شوية، كل اللي عليكي تعمليه هو إنك تختبري العجينة بخلة الأسنان:

لو طلعت نظيفة، يبقى الوصفة تمام.

لو لسه فيها عجين، غطيها شوية كمان.

وكمان، الشيف أميرة بتقولك استخدمي إيدك تتحسسي السطح من فوق وتتأكدي إنه بدأ ينشف، وده دليل إن الوصفة ماشية صح.

5. الصبر مفتاح النجاح

الكيكة أو البيتزا على الطاسة محتاجين وقت أطول شوية من الفرن، بس الفرق في الطعم والتجربة يستاهل،كل اللي محتاجاه:
نار هادية.
طاسة مظبوطة.
دهان خفيف.
تغطية محكمة.
وصبر لحد التسوية الكاملة.