أحمد رزق: شعار حرب الجبالي جذبني للمشاركة بالعمل.. ومبدخلش في صراعات فنية|خاص

كشف الفنان  أحمد زرق أكثر ما جذبه للمشاركة مسلسل حرب الجبالي، الذي يُعرض حاليًا على منصة شاهد ويحقق نجاحًا كبيرًا.

وقال أحمد رزق خلال ندوة تكريمه في نيوز رووم: “أكتر حاجة شدتني فكرة إنك إزاي تحافظ على نقائك وطهارتك وجدعتنك في وسط عالم مليء بالصراعات المميتة، والفكرة اللي شدتني، أن أكبر حرب بيخوضها الإنسان هي حربه ضد نفسه.. ومدتيش الحروب التانية أهمية، وركز مع نفسك، لأن النفس ممكن تدمر إنسان أو تنجحه، لأن النفس أمارة بالسوء".

وأضاف أحمد رزق: “شعار المسلسل وفي تتر الأغنية بيقول حربك مع نفسك أولى، وده أكتر معنى خلاني بحب حرب الجبالي.. ولو الناس حبت دراما المسلسل أعتقد هيكون هدف سامي”.

وتابع أحمد رزق: “حارب نفسك، اتقدم وقاوم الشر اللي جواك… لأن ده بيطلع من النفس.. هي اللي بتخليك تغلط وتعمل أعمال شريرة ولو هتركز في الحرب هتنجو وتطلع كسبان”.

أحمد رزق: مبدخلش في صراعات فنية

وأكد أحمد رزق: أنا مبدخلش في صراعات فنية، بخلص شغلي واختفي، الصراعات الفنية طول عمرها موجودة بدافع أنك تكون الأفضل.. وبتتصارع علشان كل واحد يكون أفضل.. والصراعات اللي بقيت تظهر شايفها إلى زوال.. وفي النهاية الحقيقة هتكون واضحة، وساعات المشاهد بيشوف مسلسل مايعجبوش ومع ذلك مكسر الدنيا على السوشيال ميديا، لكن مع الوقت الناس هتفهم اللعبة دي".

وعن سبب تأخير طرح المسلسل قال: “كنت منزعج أن المسلسل متأخر، ولما نزل اكتشفت أن توقيتات ربنا أفضل، ولو أنا بختار التوقيت مش هختار توقيت أفضل من ده”.

أحمد رزق يكشف سبب نجاح المسلسل 

وعن النجاح الكبير الذي حققه المسلسل وقت عرضه قال: “بحسب آراء الكثيرين المسلسل رجعنا لدراما زمان، لأن الناس بقالها فترة مش على وفاق مع الدراما الشعبية، وكان نفسها تشوف حاجة شبه دراما زمان، وتوقيت عرض المسلسل مثالي لأن الجمهور في احتياج يشوف دراما شعبية وشبه الدراما اللي اتعودوا عليها زمان اللي فيها من ريحة دراما زمان.. وده ممكن يكون سبب من أسباب نجاح المسلسل ولكن مقدرش أجزم”.

وعن سبب عدم تفاعله مع السوشيال ميديا، قال: "أنا مش بحب السوشيال ميديا، والناس بيقولوا إن ده تقصير، ولكنها إمكانيات، في حد عنده الإمكانية وشاطر وحد لأ، أنا عندي أفكار قديمة ومبعرفش ألعب اللعبة دي، والسوشيال ميديا جزء من شغل الفنان، ولكني مش دايمًا بصدقها”.