سابني قبل الفرح بأسبوع.. هدى الإتربي تبكي وتكشف علاقتها بمنتج شهير توفى
كشفت الفنانة هدى الإتربي عن تفاصيل قصة حبها القوية مع منتج شهير توفي، حيث أوضحت أنها كانت في علاقة عاطفية قوية معه وتمت خطبتهما، وانفصلا قبل زفافهما بأسبوع بسبب عملها في التمثيل.
وقالت هدى خلال لقائها في برنامج "العرافة" مع الإعلامية بسمة وهبة:"أنا كنت في علاقة حب قوية جدًا مع حد، منتج من أهم الناس، الله يرحمه، واتخطبنا بعد قصة حب، وقبل فرحنا بأسبوع حصلت مشكلة بسبب شغلي وسيبنا بعض، وماكانش قادر يتعامل مع فكرة المشاكل اللي هتواجهنا في الشغل، وكان أي مشكلة بتحصل بنلاقي نفسنا أطراف فيها قدام بعض، وماكانش فيه تصالح مع فكرة إنه هيتجوز ممثلة".
خيرني بينه وبين شغلي في التمثيل
وأضافت هدى الإتربي:"قبل فرحنا حصلت مشكلة مش الأولى ولا الأخيرة في الشغل، ولقينا نفسنا طرف ضد بعض، فقال لي لازم تسيبي التمثيل لأنه هيعمل لنا مشاكل، وخيرني بينه وبين شغلي في التمثيل، يعني أنت جاي تكتشف ده قبل فرحنا بأسبوع، رغم أننا وإحنا مع بعض سنتين أو أكتر؟ بعد ما فستان فرحي كان متعلق وبيتي مفروش، ودعوات الفرح اتبعتت للناس".
وأوضحت هدى الإتربي أنها دخلت في حالة اكتئاب حاد، قائلة:"جالي اكتئاب حاد واتعالجت منه في فترة طويلة، وكنت باخد أدوية قوية، وجالي نوبات غضب، والأدوية سببت لي تعب وتخن، وسببت لي مضاعفات، وعملت عملية كبيرة مش كلها اكتملت، وبعد العملية كان المفروض آخد أدوية فترة".
وأكملت هدى الإتربي: “هو توفى بعد ما سبنا بعض بحوالي ثلاث سنين، هو دلوقتي في دار الحق وأنا مسمحاه”.
وكشفت هدى الإتربي أن أحد أصدقاء المنتج الراحل تواصل معها بعد وفاته بيوم وأخبرها أنه نادمًا عليها موضحة:"في واحد صاحبه بعد ما توفي بيوم، كلمني وقال لي أنا قابلته، وقال لي: أنا أكتر واحدة حبتها هدى، وأكتر ست كنت سعيد معاها كانت هدى، بس ملعون أبو العند اللي وصلنا لكده".
