هاجر الشرنوبي تناشد المسؤولين بشأن قانون الرؤية: لازم يتغير والراجل مظلوم|خاص

انتقدت الفنانة هاجر الشرنوبي قانون الرؤية والذي يتيح للأب رؤية أبنائه بعد الطلاق، مشيرة إلى أنه قانون ظالم حيث لا يعطي الوالد الفرصة لرؤية أطفاله بشكل كافٍ بل لساعات قليلة أسبوعيًا.

وناشدت هاجر الشرنوبي الجهات المسؤولة من أجل تغيير هذا القانون، حيث قالت خلال لقائها في نيوز رووم: “القضية دي مهمة وأنا شغالة عليها ككتابة، يعني إيه أب يشوف ابنه ساعة ولا اتنين في مركز شباب؟”.

وأضافت: “يعني إيه لما اختلف مع الأم وانفصل بيبقى أنا انفصلت عن ابني كمان. يعني إيه يكون يتيم الأب وباباه عايش. فيه بنات كتير واخدين الموضوع موضة وبيستغلوا الحتة دي. وتلوي دراع الراجل وتقوله مش هتشوف ابنك، شرع ربنا مقالش كده”.

وتابعت هاجر الشرنوبي: “أنا تحمست وباخد ورشة علشان اتعلم الكتابة لأني عاوزة أتكلم عن القضية دي، إحنا كسيدات عندنا منظمة حقوق المرأة وبنرد كويس.. لكن الرجالة مركزين في شغلهم ووراهم مسؤوليات مش مركزين أنهم يردوا، وبقول لهم أنتم غلطانين.. لازم الموضوع ما يتسكتش عليه”.

شرع ربنا مقالش كده 

وطالبت هاجر الشرنوبي بضرورة تغيير الموضوع، قائلة: “القانون ده لازم يتغير. وشرع ربنا ما قالش كده. وأول واحدة هيحاسبها الطفل لما يكبر الأم. لأنه هيكبر وهيفهم وهيبقى شاب وهيسمع للطرفين.. ومش بيعيد يكرهها. ليه الناس مش بتتعامل مع ربنا”. 

واختتمت هاجر الشرنوبي حديثها قائلة: “بناشد كل الجهات المسؤولة بضرورة تغيير قانون الرؤية، لأنه قانون ظالم للراجل”.

نيوز رووم يكرم هاجر الشرنوبي بعد تألقها في حكيم باشا 

وكرم موقع نيوز رووم الفنانة هاجر الشرنوبي بعد تألقها في مسلسل حكيم باشا الذي عُرض في الموسم الرمضاني 2025، وجسدت خلاله دور صفا، والمسلسل بطولة النجم مصطفى شعبان، وضم نخبة من الفنانين منهم: رياض الخولي، سلوى خطاب، سهر الصايغ، دينا فؤاد، أحمد صيام، محمد نجاتي، منذر ريحانة، سلوى عثمان، سارة نور، وعدد آخر من الفنانين، والعمل من إخراج أحمد خالد أمين، وتأليف محمد الشواف.