"مش شخلل عشان تعدي!!".. رمزي عبد العزيز عن حادث المنوفية: محتاجين قوانين صارمة

أعرب رمزي عبد العزيز، الدكتور في علم تكنولوجيا الناتو كلية الهندسة جامعة كيل الألمانية، عن حزنه الشديد بشأن حادث المنوفية الأليم الذي رحل فيه 19 من بنات قرى مركز منوف بسبب حادث سير على الطريق الدائري الإقليمي قائلًا: “محتاجين قوانين صارمة وعمل تحاليل دورية، واختبارات أهلية وتأهيل والسيارات محتاجه تقييم دوري.. كل دا يُطبق ويُفعل”.

وكتب عبدالعزيز "لا أستطيع أن أضع نفسي ولو لدقيقة واحدة مكان أب أو أم أو أي فرد من أسرة الـ 19 فتاة اللي ماتوا بالأمس في حادث طريق الموت الأليم وأصبحوا في خبر كان.. ولا نقول إلا ما يرضي ربنا إنا لله وإنا اليه راجعون.. منظر أهالي القرية ومنظر الـ 19 نعش، وأشلاء البنات بيلموهم ويجمعوهم قطع، بنات في زهرة أعمارهن، خارجين من أجل لقمة العيش طلبا للفتات من الرزق بالحلال".

وتابع: "ملف الطرق في مصر والوفيات بسببه، محتاجه ناس أهل كفاءة وليس أهل ثقة بكل مصداقية. سواقين السيارات الكبيرة وناقلات الشحن وكذلك سائقي الميكروباص وغيرهم، محتاجين قوانين صارمة وعمل تحاليل دورية، واختبارات أهلية وتأهيل والسيارات محتاجه تقييم دوري.. كل دا يُطبق ويُفعل .. مش شخلل عشان تعدي!!

وأضاف: "حضرتك عشان تمسك رخصة سواقة في ايدك في أي دولة متقدمة وبتعلي قيمة العلم والتخطيط وحفظ ارواح الناس، ممكن تبذل شهور بل سنوات لكي تمسك الرخصة في إيدك.. أنا كنت قربت أشوف حلمة ودني عشان آخد رخصة السواقة في ألمانيا، امتحاناتها أصعب من امتحانات الدكتوراه في ألمانيا. ووالله رسبت أول مرة .. بيحاسبك على انك بتسوق أداة قاتلة ومؤتمن على أرواح الناس، بيسقطك في الإمتحان على لفتة الرأس والتغيير من حارة لحارة".

وأوضح: "الطرق مجهزة بحدود السرعات، السيارات مؤمن عليها، وفيها كل أدوات الأمان.. مش كل كمين والتاني تكرمش فلوس وتعطيها لكي تخالف قواعد المرور!!.

سواقين النقل الثقيل في ألمانيا بالرغم أنهم ماشيين على طريق ضخم ومجهز وحارات كتير والسرعة فيه ليس لها سقف، إلا انهم ملتزمين بالسير في أوقات محددة ولهم حارات محددة يمشوا فيها. وأيضا سياراتهم فيها أجهزة تمنعهم من زيادة السرعة عن رقم محدد تحت الـ 100، عندنا في مصر سواقين النقل بيعملوا غرز، وينافسوا الملاكي ويسابقوا سواقين الميكروباص، والله في أحد زيارتي لمصر مرة سواق ترلة، كان هيدخلنا تحته في لفتة نظر لولا حفظ ربنا وصديقي انتبه، خرجنا بإعجوبة من دعك محقق. ويا سلام لو نجيت منهم تلاقي حجارة نازلة عليك ظلط او رملة، بيطير وينزل فوق ادمغة الناس، وغيره".

تسريب برنامج الرادارات الخاص بالمرور

وأكمل: "مرة كنت جالس مع واحد، اقسم بالله منزل برنامج الرادارات الخاص بالمرور ومنزله في سيارته. وعارف الشرطة واضعه الرادارات فين!!؟؟.

تخيلوا في ناس بتبيع تطبيق الرادارات الخاص بأجهزة الشرطة سوق سودا .. واللي معاه التطبيق بيكون عارف مكان الرادارات ومحدث بشكل يومي فيهدي وبعدها يطيح في الناس".

واختتم: "نفسي أعرف مين هيجيب حق الفتيات وعواءلهم مين هيعوضهم!؟ وهيعوضهم بإيه وبكام!؟ .. مين هيعرفنا سبب الحادث بمصداقية وشفافية!؟ مين هيتحاسب بحق ربنا ويتحمل المسؤلية ويتعاقب!؟ مين هيعدل في خطط المرور ويطور حتى لا تستفيق مصر على فاجعة أكبر وأشرس!! لا تنسوهم بالدعاء يا أفاضل وربنا يصبر اهاليهم وذويهم".