طريقة عمل شاورما الفراخ وصوص الثومية زي المحلات في البيت خطوة بخطوة

شاورما الفراخ مع صوص الثومية من الأكلات اللي مش ممكن تملّي منها، ومهما جربتيها برا البيت، طعمها في البيت ليه مذاق مختلف لما تتحضر بحب وبهارات متوازنة. في الوصفة دي، هنعرفك خطوة بخطوة إزاي تعملي شاورما دجاج زى المحلات بالظبط، ومعاها كمان طريقة عمل الثومية الكريمي في البيت بدون بيض وبمكونات اقتصادية.
مكونات شاورما الفراخ:
- شرائح دجاج بانيه مقطعة رفيعة
- ماء بصل
- عصير طماطم مبشورة
- خل – ليمون
- ثوم مفروم
- ملح – فلفل أسود
- بابريكا – ثوم بودرة
- سمنة بلدي – شرائح بصل
مكونات الفتة بالشاورما:
- شاورما الفراخ المحضّرة
- رز بسمتي
- كركم – كاري
- مرقة دجاج
- خبز شامي أو أبيض محمّص أو مقلي
- شوربة أو مرقة دجاج للسقي
مكونات الثومية السوري: - 3–5 فصوص ثوم
- كوب ماء
- 2 ملعقة كبيرة نشا
- علبة زبادي صغيرة
- عصير ليمونة
- رشة ملح وفلفل
- خل
- زيت نباتي
- اختياري: ملعقتين مايونيز لزيادة الكريمية
طريقة تحضير شاورما الفراخ:
1. التتبيلة أولاً
اخلطي كل مكونات التتبيلة (ماء البصل، الطماطم، الخل، الليمون، الثوم، التوابل) وضيفي لها شرائح الفراخ. غطّيها وسيبيها تتتبّل في التلاجة أقل حاجة ساعتين، ولو من بالليل يكون أحسن.
2. الطهي
سخّني طاسة على نار عالية جدًا، ضيفي سمنة بلدي، ولما تسخن كويس، صفي الفراخ من التتبيلة وحمّريها بسرعة. ممكن تضيفي شوية من التتبيلة أثناء التسوية بس خلي بالك ما يبقاش فيها مية كتير.
3. التشويح الأخير
ارفعي الفراخ، وفي نفس الطاسة شوّحي بصل شرائح لحد ما يكرمل، وبعدين رجّعي الفراخ وقلبّيهم مع بعض ورشي رشة فلفل أسود إضافية.

طريقة تحضير الفتة:
1. الخبز
قطّعي الخبز لمكعبات صغيرة، وحمّريه في زيت أو حمّصيه في الفرن حسب الرغبة.
2. الرز البسمتي
في حلة على النار، غلي 2 كوب ماء مع مكعبين مرقة، ومعلقة صغيرة كاري وأخرى كركم، وبعدين ضيفي كوب وربع رز بسمتي واطبخيه كالمعتاد.
3. التقديم
في طبق التقديم، حطي الخبز أول طبقة، ورطّبيه بشوية شوربة، ثم ضيفي الرز، وبعده شاورما الدجاج، وعلى الوش كمية حلوة من الثومية.

طريقة عمل الثومية الأصلية بدون بيض:
1. في كسرولة، دوبّي ملعقتين نشا في كوب ماء على النار مع التقليب المستمر لحد ما يبقى قوامه زي المهلبية.
2. في الخلاط، ضيفي الثوم، الزبادي، خليط النشا، الملح، الفلفل، الليمون، الخل، وشغّليه. بعدين ضيفي الزيت بالتدريج لحد ما تحصلي على قوام ناعم وكريمي. ممكن تحطي ملعقتين مايونيز في الآخر لطعم أغنى.
