مؤسسة مبادرة بداية جديدة: "اللي ماتوا أثبتوا أن الكرامة أغلى من أي حاجة"
علقت الإعلامية ومؤسسة مبادرة بداية جديدة 2013 نجلاء عياد، على رحيل 19 من بنات قرى مركز منوف بمحافظة المنوفية، إثر حادث سير على الطريق الدائري الإقليمي، بعد إصطدام سيارة نقل ثقيل بسيارة ميكروباص قائلة: "قهر وحزن إن فى بنات زى الورد كانوا بيشقوا علشان يومية 130 جنيه".
وكتبت نجلاء على صفحتها الشخصية على موقع التواصل الاجتماعي "فيسبوك": "قهر وحزن أن فى بنات زى الورد كانوا بيشقوا علشان يومية 130ج.. وع التيك توك ناس بيبقوا قاعدين فى بيوتهم بيشحتوا وبيهينوا نفسهم علشان يطلعوا فى اليوم 100 ج أو حتى 50ج".
وتابعت نجلاء عياد: "اللي ماتوا اختاروا الشقى والتعب مستسهلوش واختصروا الطريق زى التانيين.. فيهم بنات فى كليات واللى بيدرسوا بمراحل تعليمية مختلفة مكانوش بيتكبروا على الشغل كان همهم يساعدوا نفسهم ويساعدوا أهلهم.. كانت عندهم أحلام وأمنيات أن بكرة هيكون أرحم بيهم، اللي ماتوا أثبتوا إن الكرامة أغلى من أي حاجة، وجع قلب بجد".
مهن تعمل بيومية أقل من 130 جنيه
وعن نفس الحادث نشرت الإعلامية ومؤسسة مبادرة بداية جديدة 2013 نجلاء عياد تغريدة جديدة أشارت فيها إلى وجود بعض الهمن التي تعمل براتب أقل ويومية أقل من ذلك قائلة: “فى ناس مستغربة إزاى فى شغل يوميته 130 ج .. طب هتعملوا إيه لما تعرفوا أن فى مرتبات وبمدارس خاصة بـ 1500 ج، لمدرس(نشاط) و 3000 ج لمدرسي المواد، لو حسبتوها هتبقى اليومية 100 ج و 50 ج”.
وتابعت: “اللى بندفع منها كمان مواصلات، ومحدش يقولي فى دروس خصوصيه بتعوض..
أنا هنا بتكلم وبسلط الضوء ومن صميم شغلى اللى اشتغلته، كمدرسة تربية موسيقية اللى بيتقال عن الموسيقى والتربية الفنية والألعاب ( مدرسين نشاط ).. يعنى مش بنتعامل بدروس خصوصية، وكمان بيتم التعامل مع مدرسين الأنشطة بإستعباد اللى هو الحصص الاحتياطى لو مدرس غاب بنشيلها كنا فوق حصصنا، ولما الواحد يشتكى كان يتقال هو كدة”.
وأضافت: “أنا فى مرة من 3 سنين ناظرة المدرسة لاقيتها جامعة ليا حصتين بحصة واحدة مرحلتين مختلفتين أولى ابتدائي مع تانية إعدادى .. لاقيت 80طالب قدامى ولازم أنا اللى اسليهم والله العظيم، لما اعترضت قالتلى زعلانة ليه حصتك بالنسبة ليهم تسلية، غنيلهم 😁 ولازم اثبت قدراتى بالسيطرة على الفصلين وإلاهيكون فى جزا وخصم.. فضلت اقدم استقالتى بكل هدوء بعدها ولأسباب تانية بس دى كانت أحد الأسباب”.
وأوضحت: “مدرسين الأنشطة حقهم مهدور لما كنت بنادى بأن حصص الأنشطة جزء مهم جدا أن الاولاد يمارسوا هوايات مفيدة ومنها نبعدهم عن العاب الانترنت العنيفة وعملت حملة بمدرسة لمكافحة العاب الانترنت ونهتم بالأنشطة كان نفسي يكون فى تشجيع اكبر من وزارة التربية والتعليم لما طلعت بقناة مدرستنا وناشدت بذلك، أنا لأول مرة اطلع وأتكلم عن موضوع مرتبات مدرسين الأنشطة بس يمكن بالمرة فرصة صوت مدرسين الأنشطة، يوصل لوزارة التربية والتعليم”.
