صابرين جابر تكشف لنيوز رووم خطوات التعامل مع الشريك وقت الأزمات والحروب
الحاجة إلى الحب من أقوى الاحتياجات التي يمتلكها البشر، لتمتلئ القلوب به وتشعر بالرضا وتصبح أكثر صبرا وأكثر تعاطفا ولطفا. ولتحقيق الاكتفاء من الحب، يحتاج الإنسان إلى علاقات صحية مع من حوله، خصوصا العلاقات ذات الأولوية مثل العلاقات الزوجية، زكذلك وسط أخبار الحروب والطقس العام الذي قد يحمل القلق والتوتر بين الطرفين، في هذا السياق كشفت صابرين جابر خبيرة العلاقات الأسرية في تصريحات خاصة لموقع “نيوز رووم” كيفية تحسين العلاقة مع الشريك وسط أخبار الحروب المقلقة.
"لا تستخفي بمشاعره"
قالت صابرين "ما تستخفّيش بمشاعره حتى لو شكلها مش منطقية، في أوقات الخوف كل حد بيعبر بطريقته لو لقيتيه ساكت، متوتر، أو حتى بيتصرف بغرابة حاولي تفهميه.
وضع مساحة للهدوء
اعملي مساحة للهدوء بينكم، مش لازم كل وقت يبقى كلام ونقاش وتحليل، فأوقات وجودكم مع بعض في هدوء من غير ضغط بيكون أريح من ألف محاولة تهدئة بالكلام.
نصائح للتعامل مع الشريك في الوقت الصعب
فكري دايمًا إنكم مش بتتنافسوا على مين تعبان أكت، فهو ليس سباق مين فيكم مضغوط أكتر أو خايف أكتر، فالوضع يحتاج ا تعاون وليس مقارنة.
احترمي طريقته في الهروب أو الراحة
لو بيحب يسمع مزيكا، أو يفضل ساكت، أو يلعب جيم، مش لازم تفسري ده إنه بعد كل واحد بيهدي خوفه بطريقته .
-خلي علاقتكم هي المساحة اللي بيهرب ليها مش منها
لو بقى خايف يقولك حاجة علشان ما تتضايقيش أو تحكمي عليه يبقى العلاقة دي فيها حاجه غلط .
طمني قلبه إنه بيتشاف ويتفهم.
-شاركيه حاجة تفرح حتى لو بسيطة جدًا
فيديو يضحك، صورة قديمة ليكم، حاجة خفيفة كده.
في عز الضغط اللقطه الحلوة بتفرق.
- اخلقي روتين بسيط خلي بينكم عادة ثابتة.
مكالمة، كلمة، حتى “تصبح على خير” بانتظام الروتين ده بيحسس إن في حاجة لسه ثابتة وسط كل المتغيرات.
-خليكي مصدر طاقة مش سحب طاقة
لو كل كلامك شكوى وتوتر، هيتعب، وهتتعبوا.
قسمي كلامك بين فضفضة ودفا مش لازم كل حاجة تتقال وقت ما بتحصل.
قولي له إنك فخورة بيه حتى لو هو مش شايف نفسه كده
الدعم النفسي وقت الأزمات بيبني،
قولي له “أنا شايفة فيك قوة”، “أنا حاسة بأد إيه بتحاول”، الكلمة دي بتسند أكتر مما تتخيلي.
واهم نقطه، العلاقة وقت الأزمات مش اختبار مين هيستحمل التاني، فهي فرصة تشوفوا إنكم سند حقيقي لبعض، مش بس حبايب في وقت الراحة.
