لؤي الخطيب: سيرة النبي الكريم روشتة ناجحة لأي حد في حياته

تحدث الكاتب الصحفي لؤي الخطيب، عن هجرة النبي محمد صلَ الله عليه وسلم إلي يثرب، وعن قدرته العبقرية في الإخاء بين المهاجرين والأنصار، وكيفية تطبيقها والإستفادة منها في مجتمعنا الحالي.

وجاء ذلك في منشور له عبر حسابه الرسمي على موقع "إكس"، قائلاً: "بحب دايما أتأمل رحلة النبي صلى الله عليه وسلم، من منظور بشري بعيدا عن القداسة الدينية، لإن الزاوية دي بتوضح عناصر مبهرة في شخصية ومهارات إنسان، بكل المقاييس عبقري".

وتحدث عن تحديات الهجرة إلى يثرب موضحاً: "ملابسات الهجرة عجيبة جدا، شخص عنده ٥٣ سنة، عارف انه مؤيد من السماء، بس بيضطر بعد ١٣ سنة من الإيذاء يسيب بلده ويبدأ في مكان تاني، مع مجتمع جديد، بعادات تانية، بأفكار مختلفة.. وبعد ١٣ سنة كاملين بيآمن بيه حوالي ١٢٠ شخص بس، هيبقى مطلوب منه يدمجهم كمان في المجتمع الجديد المختلف عنهم تماما، ١٢٠ شخص يعني بمعدل أقل من ١٠ كل سنة.. ومع ذلك بيكمل وبيهاجر، بيبدأ من جديد تحدي مستحيل بالورقة والقلم".
وأضاف: "القرآن بيوضح لنا في أكتر من موضع إن النبي كان بيزعل من قلة المؤمنين، "فَلَعَلَّكَ بَاخِعٌ نَّفْسَكَ عَلَىٰ آثَارِهِمْ إِن لَّمْ يُؤْمِنُوا بِهَٰذَا الْحَدِيثِ أَسَفًا".. يعني في أثر نفسي صعب، يُضاف لكل العقبات الضخمة دي".

وتطرق إلي نقطة القيادة لسيدنا محمد: "يعمل ايه بقى القائد العبقري صاحب السمات والمهارات الشخصية الاستثنائية؟ يتغلب على كل ده، ويحاول مرة واتنين وتلاتة وعشرة، فمثلا يثرب ماكانتش الاختيار الأول، هو حاول يروح أماكن تانية كتير وماظبطتش.. بس فضل ورا المحاولات لحد ما لقى مكان يهاجر له.. وبعد الرحلة الشاقة دي، لسه هيبدأ يأسس مجتمع جديد، هيواجه تحديات داخلية نتيجة تغييرات في بنيته، وخارجية، نتيجة موازين القوى المحيطة بيه، بس بردو بيكمل ومابيوقفش".

واختتم تغريدة نصيحة للتأثر بسيرة سيدنا محمد، ذاكراً: "ملخص سيرة النبي الكريم، إنها روشتة ناجحة لأي حد عايز يحقق حاجة في حياته، تصميم وصبر وتكرارات لا تنتهي لحد ما تحقق المطلوب.. ليه بقى دي عبقرية؟ علشان هو مش خريج جامعة عريقة درس فيها علوم الإدارة، ولا كان موجود في مجتمع فذ متحضر لقى ناس تعلمه المهارات دي.. لأ، هو شخص اتولد في بيئة صحراوية قاسية، لكن عرف بذكاء شديد يتعلم من التجارة ورعي الغنم ازاي يتعامل مع الحياة ويطوعها.. كل سنة وحضراتكم طيبين".

السيسي يهنأ الشعب المصري بالعام الهجري الجديد

وفي السياق نفسه، هنأ الرئيس عبد الفتاح السيسي الشعب المصري بمناسبة حلول العام الهجري الجديد، قائلًا: "أهنئ أبناء الشعب المصري العظيم، وجميع شعوبنا العربية والإسلامية، بمناسبة حلول العام الهجري الجديد 1447".