قرار صعب .. حمزة علاء يودع الأهلي بعد 16 عاما فى القلعة الحمراء

ودع حمزة علاء النادي الأهلي بعد انتهاء عقده والرحيل بشكل رسمي، والاقتراب من إعلان وجهته الجديدة.

وكتب حمزة علاء عبر صفحته الرسمية عبر موقع التواصل الاجتماعي "انستجرام": "أكيد الكلام جاي متأخر وعشان كده حابب أعتذر، من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم في النادي الأهلي".

أضاف: "قرار الرحيل كان صعب ، لكن كان لازم أن أفكر في مستقبلي، يمكن الفرصة مجتش زي ما كنت أتمنى بس كل حاجة بتحصل بيبقي ربنا كاتبها ورب الخير لا يأتي إلا بالخير، لجمهور النادي الأهلي العظيم محبتكم وشكركم عمرهم ما كانوا مرتبطين بعدد الدقايق اللي لعبتها دايما كنتوا سند في كل لحظة، في كل بطولة. حسيت معاكم إني أحسن حارس في العالم وأنا بلعب في بطوله افريقيا والاولمبياد، كل اللي طلبته، إنكم تفضلوا فاكرين إني كنت واحد منكم و ابن من ابناء النادي الأهلي".

أكمل: "لإدارة النادي بقيادته الكابتن محمود الخطيب، شكرًا على كل لحظة حسيت فيها إني جزء من الكيان".

وتابع: "لزمايلي إنتوا إخواتي وعيلتي اللي عمري ما هنسي أيامها وبتمني ليكم كل التوفيق والنجاح".

وأوضح: "لكل مدرب اتمرنت معاه داخل النادي، شكراً من كل قلبي على كل لحظة دعمتوني فيها أو علمتوني فيها حاجة ، ولكل عامل تشرفت بالشغل معاه انتم عارفين معزتكم عندي".

وشدد تصريحاته: "ولشعب الاهلي هفضل دائمًا مشجع للكيان من قلب التالتة شمال ويا رب أرفع راسكم وأكون عند حسن ظنكم في خطوتي الجايه، وتكونوا دائمًا في ضهري وسند ليا زي ما طول عمركم عودتوني".

واختتم تصريحاته: "اشوف وشكم علي خير .. ابنكم حمزة علاء".