أنا من رعاياك.. الحاجة نجوى من طنطا تناشد الرئيس السيسي بجهاز لابنتها |صور

في استغاثة إنسانية مؤثرة، وجهت الحاجة نجوى، أرملة ومريضة من سكان منطقة جانبية القرشي بمدينة طنطا بمحافظة الغربية، نداءً عاجلًا إلى الرئيس عبد الفتاح السيسي، تطالبه فيه بالتدخل لإنقاذها وأسرتها من التشرد بعد أن تراكمت عليها الديون، وتدهورت ظروفها الصحية والمعيشية.

قالت الحجة نجوى خلال لقائها مع "نيوز روووم":"أنا مريضة كانسر ثدي، باخد العلاج على نفقة الدولة، بس ساعات بيكون العلاج مش متوفر ومش بقدر أشتريه من برّه. وعندي السكر المفترس، وبنتي كمان عندها نفس المرض ومحتاجة علاج، وأنا أرملة وعندي ولدين وبنت، والولد اللي بيشتغل عنده 14 سنة بس، والبنت عندها 21 سنة ومريضة."

تقيم الحجة نجوى في أحد المساكن التابعة لهيئة السكة الحديد بمدينة طنطا، وهي مساكن غير آدمية وتفتقر لأبسط مقومات الحياة الكريمة. وأشارت إلى أن هيئة السكة الحديد امتنعت عن تحصيل الإيجار لمدة ثلاث سنوات كاملة، ثم عادت فجأة وطالبت السكان بالسداد بأثر رجعي، ليصبح إجمالي الإيجار المتراكم عليها 36 ألف جنيه.

وأضافت بأسى: "كنت بدفع 40 جنيه إيجار، دلوقتي بقي 750 جنيه، وأنا مش قادرة أدفع، والنور عليا 24 ألف جنيه، قالولي يا تدفعي يا تتطردي من المكان. وأنا معاشي 1000 جنيه، بيكفوا إيه؟ لا أكل ولا شرب ولا علاج."

ووصفت حال السكن قائلة: "في الشتاء المية بتدخل علينا، بفرش المراتب وبحط عليها أطباق عشان ما تتبلش. إحنا بنغرق، وحياة أولادي مهددة، ومفيش أي جهة بتتحرك."

وتحدثت الحجة نجوى عن مستقبل ابنتها الذي ضاع بين المرض والعوز، فقالت: "فركشت خطوبتين لبنتي، مش قادرة أجهزها. بييجوا على ميعاد الفرح، وأنا مش لاقية أعمل حاجة. أقولهم أجهزها منين؟ هدفع منين؟"

واختتمت حديثها بنداء إلى الرئيس عبد الفتاح السيسي، قائلة:"أنا من رعاياك يا ريس، نفسي في كشك أعيش منه، أو مصدر دخل يساعدني أجهز بنتي وأعالجها. نفسي أعيش بكرامة، ناكل ونشرب ونعيش زي الناس."صرخة الحاجة نجوى تعكس معاناة كثير من الأسر التي تعاني في صمت، وتنتظر لفتة إنسانية تعيد لها الأمل في حياة كريمة.