خالد ابو بكر لوزير الداخلية: مسلسلات رمضان سبب في إرتفاع معدل الجريمة
وجه الاعلامي والمحامي الدولي، خالد أبو بكر، رسالة للواء محمود توفيق، وزير الداخلية، بسبب بعض الأعمال الدرامية التي تعرض حاليا في رمضان.
وكتب خالد أبو بكر عبر حسابة بموقع التواصل الاجتماعي "فيسبوك": "السيد اللواء محمود توفيق، وزير الداخلية، تحية طيبة، وبعد، تعلمون ان الدراما سلاح خطير يؤثر في العقول تأثير مباشر وأثره أكبر من تأثير الخطط الحكومية للنهوض بالعقول وكان عندنا السنة دي بعض أعمال درامية ناجحة ومحترمة وتستحق التقدير لكن احنا أسفين يا سيادة الوزير".
البلطجة وتجارة السلاح والأثار في دراما رمضان
وتابع:" صرفنا شوية فلوس علي بعض أعمال درامية فيها بلطجة وسلاح وخطف وخناقات وتجارة أثار .. هو كمان معلش كان في بعض الأعمال المنتجة في رمضان السنة دي شوية ألفاظ، الحقيقة جديدة من نوعها، افتكر كمان كان في شكل للشارع المصري يظهر إن معدل الجريمة مرتفع حبتين".
وأشار " أنا طبعا وسيادتك عارفين إن الكلام ده هيبقي له أثره في الشارع .. وإن كتير من الشباب الصغير بيتأثر بمثل هذا النوع من الأعمال
فمبدأيا إحنا أسفين لو ضباط مكافحة المخدرات الشغل تقل عليهم حبتين، ولو ضباط المباحث الجنائية ضاعفوا شغلهم مرة كمان،
ولو ضباط مباحث الأنترنت الدنيا عندهم بقت صعبة .. يمكن ده يفضل لحد رمضان اللي جاي، أنا بس عندي سؤال يا فندم :
هو ده الشارع المصري بتاعنا ؟ .. هي دي الأحياء المصرية بتاعتنا الجميلة اللي بيحكمها الأدب والأصول قبل القانون؟ .. مش عارف !! .. هو كمان يا فندم إحنا أسفين بالمره إن التعليم والثقافة في البلد بعافية شويتين وإن مواقع التواصل الإجتماعي بينت حال كتير مننا والوضع اللي وصلناله".
أين الدراما من شهداء الشرطة؟
وتابع أبو بكر:" الكام موضوع اللي فاتوا دول أنا عارف ممكن يكلفوك يا سيادة الوزير ضباط من خيرة شبابنا تروح حياتهم في مقاومة العنف والجرائم المتنوعه، إحنا اصلي مع انشغالنا بالحرب على الإرهاب ماعملناش أعمال درامية كافية تشرح دور الرجالة اللي راحت من ضباط مكافحة المخدرات وضباط الامن العام والمباحث، الشهداء اللي راحوا في مواجهة الجريمة عشان يحموا الشارع المصري ويحافظوا على البيوت المصرية آمنة رحمة الله عليهم" .
واستكمل:" طولت عليك يا سيادة الوزير أنا أسف بس أنا بقترح علي سيادتك يوم الأربعاء اللي جاي في إجتماع الحكومة برئاسة الدكتور مصطفي مدبولي، هل ممكن تقول للوزراء مجتمعين إن كده كتير؟ .. هل ممكن تقولهم إن ضباط الداخلية هما اللي في الشارع وإن الكلام ده بيشوفوا أثره في صورة جرائم؟! .. هل ممكن يا فندم تقولهم حقيقة الشوارع المصرية الطيبة خاصة في الأماكن الشعبية اللي بيحكمها الأصول؟! .. طيب ممكن في الاخر تسألهم يافندم هو إحنا بنعمل في روحنا كده ليه ؟ ".
