نيللي كريم تكشف موقفها من الزواج مجددًا ومواصفات شريك أحلامها

تحدثت الفنانة نيللي كريم، عن علاقتها العاطفية، وإمكانية دخولها في قصة حب والزواج مجددًا، كاشفة أيضًا عن مواصفات شريك أحلامها المستقبلي.

وقالت نيللي كريم في لقاء لها: “تجاربي في الحب مكانتش ألطف حاجة، بقيت أبص للصفحة دي من بعيد شوية”.

وأضافت: “مفهوم الحب عندي مش كلام، بل مواقف واهتمام، زي إنك تبقى مريح الشخص اللي قدامك، ويكون فيه سلام نفسي، ويكون في احتواء واحترام، كلمة حب لوحدها مش كفاية.. الحب لوحده لا يكفي”.

وتابعت نيللي كريم: “الغلطة إنك لما تتجوز شخص تحس أنك ممكن تغيره أو تخليه أحسن، لأنك صعب تغير بني آدم، لازم تاخد البني آدم على عيبه، مفيش بني آدم بيتغير الطبع غلاب، الحب زي البطيخة وأنت ونصيبك”.

نيللي كريم تكشف إمكانية زواجها مرة أخرى 

وعن إمكانية زواجها مرة أخرى، أوضحت: “ساعات بكون قافلة وساعات بقول طيب ما يمكن، بسيب الأمور لظروفها، أنا معنديش غضب من حد، فيه ناس غضبانة من الرجالة، مش عندي الغضب ده، وعندي أمل أن أكيد في رجالة محترمة وعلاقات بتنجح، وناس بتتجوز وتكمل مع بعض، أنا أبويا وأمي قصة حب وعاشوا 25 سنة، وصحابي متجوزين جوازات سعيدة، وأنا ما قلبتش شخص عرفنا نكمل مع بعض ومفيش حاجة مش ممكنة”.

مواصفات شريك أحلامها

وعن مواصفات شريك أحلامها قالت نيللي كريم: “يبقى الراجل واثق من نفسه وعارف هو عاوز إيه في الحياة، الراجل بالنسبة لي قرارات وله كلمة وموقف، أنا مش بحب الشخصيات المهزوزة”.

كما قالت نيللي كريم إنها رجل البيت، حيث يعتمد عليها الجميع في كل شيء، موضحة: “أنا راجل البيت معتمدين عليا، وساعات بحس أني نفسي اعتمد على حد”.

وبسؤالها عن إذا كان هناك موقف شعرت فيه بالانكسار قالت: “مواقف كتير لكن مش بقعد فيها كتير، تصرفات البني آدمين هي اللي بضايقني، وبسأل ليه ما يكونش الشخص محترم وصريح وواضح".