الإمتحان سهل وفيه تركات بالنحو..أراء طلاب الثانوية بامتحان العربى بالدقهلية

أدى طلاب الشهادة الثانوية العامة بالدقهلية اليوم امتحان اللغة العربية، ويعتبر اليوم هو اليوم الثالث منذ بداية الامتحانات، حيث انتهى الطلاب من امتحانات المواد التى لا تضاف فى المجموع مثل التربية الدينية والتربية الوطنية واللغة الأجنبية الثانية "الفرنساوى".

أراء طلاب الثانوية العامة بالدقهلية فى امتحان اللغة العربية:

إختلفت اراء طلاب الثانوية العامة اليوم فى مادة اللغة العربية، حيث أعرب بعض الطلاب عن مدى فرحهم من سهولة امتحان اللغة العربية، واعرب البعض الاخر عن مدى حزنهم من صعوبة الامتحان.

الإمتحان كان سهل: 

قال احمد محمود طالب ثانوية عامة بالدقهلية:" الامتحان كان سهل اوى لدرجة ان كل الناس حلت، ومكنش فيه حاجه صعبه خالص غير كام نمرة فى النحو، ودا طبعا علشان يميز الطالب اللى مذاكر من الطالب اللى مش مذاكر".

الامتحان كان متوسط: 

وقال عبدالمجيد شوقى طالب ثانوية عامة بالدقهلية: " الامتحان كان فى مستوى الطالب المتوسط، يعنى هو مش سهل ومش صعب فى نفس الوقت، ومحتاج يكون الطالب مذاكر كويس علشان يعرف يجيب فيه درجه كويسة، والوقت كان مكفى اننا نخلص ومكنش الامتحان طويل بس كان فيه كام تريكايه بس هما اللى صعبين".

الامتحان كان صعب: 

وقالت عائشة السيد طالبة ثانوية بالدقهلية: " ان الإمتحان كان صعب اوى وطويل ملحقناش نحله كله، مكمله حديثها وهى منهاره فى البكاء: ان ليه هما بيجيبوا الامتحانات صعبه كدا، احنا مستقبلنا بيضيع، احنا ذاكرنا طول السنه وتعبنا واهلنا تعبوا معانا اوى علشان نحقق اللى بنحلم بيه".

وأوضح المهندس محمد الرشيدي وكيل وزارة التربية والتعليم بالدقهلية، أن عدد الطلاب المتقدمين لأداء امتحانات الثانوية العامة هذا العام بمحافظة الدقهلية بلغ 64320 طالبًا وطالبة، موزعين على 162 لجنة امتحانية تغطي كافة الإدارات التعليمية بالمحافظة منها 4 لجان خاصة.

أضاف اللواء طارق مرزوق محافظ الدقهلية إن امتحانات الثانوية العامة تمثل مرحلة فارقة في حياة الطلاب وأسرهم، وأن الدولة بكامل أجهزتها تولي هذه المرحلة أهمية قصوى، مشددًا على ضرورة تضافر الجهود والعمل بروح الفريق الواحد لعبور هذه الفترة بأعلى درجات النجاح والانضباط.