مصدر بالإسماعيلي: توجيه الشكر إلى تامر مصطفى.. والعجوز مدربا مؤقتا

أخطر مسؤولو النادي الإسماعيلي برئاسة نصر أبو الحسن، تامر مصطفى المدير الفني للفريق، بعدم تجديد تعاقده مع الفريق وتوجيه الشكر له على الفترة التي قضاها داخل النادي. 

أحمد الشيخ: الإسماعيلي لم يعالجني وانتظار القيد لحسم تجديدي أمر مهين

الإسماعيلي يستعجل تامر مصطفى لارسال تقريره الفني عن لاعبي الفريق

وقرر مجلس الإسماعيلي، تعيين أحمد العجوز مديرا فنيا للفريق، وبدأ فترة الاعداد يوم 26 من شهر يونيو الجاري، لحين التعاقد مع مدير فني جديد. 

من ناحية أخرى كشف أحمد الشيخ لاعب فريق الإسماعيلي، عن أسباب رحيله عن الدراويش وحقيقة تجديده للفريق عقب نهاية عقده مع النادي. 

أحمد الشيخ على فيس بوك 

وكتب أحمد الشيخ على حسابه عبر فيس بوك: دخلت الإسماعيلي في يناير الموسم الماضي بناء على رغبة من إيهاب جلال رغم أني وقتها كنت مخلص مع مودرن لكن حبي للإسماعيلي وإيهاب جلال كان سببا رئيسيا للانضمام، وفي بداية انضمامي كان هناك عملية بسيطة استغرقت 6 أسابيع، كنت محتاج تأهيل بعدها لكن إيهاب جلال قالي إنه في احتياج ليا ومش هنقدر نعمل تأهيل وفعلا استجبت بسبب وضع الإسماعيلي الصعب وقتها، بعد كل مباراة كنت بشارك فيها، كان بيجيلي ألم ورشح في الركبة بيمنعني حتى من المشاركة في التمرين بين الماتشات لكني كنت مستمر في المشاركة في المباريات مع كابتن إيهاب.

وأضاف الشيخ: بعد انتهاء الموسم ذهبت لقطر للكشف على رجلي وقالولي بسبب الحمل الزائد بدون تأهيل هحتاج أعمل عملية أخرى وتأهيل ممكن يستمر لمدة 6 شهور، بدأت رحلة العلاج فعلا ولم أحصل على جنيه واحد أثناء علاجي سواء للعملية أو الإقامة أو الطيران وكله كان على حسابي لدرجة إني بيعت عربيتي وكان بييجي عليا أيام مكنتش بقدر أروح أعمل سيشن التأهيل اللي كانت بـ13 ألف جنيه للسيشن الواحدة والمفروض أروح 4 مرات في الأسبوع. 

وتابع: النادي تدخل بعد محايلات مني أنهم يتواصلوا مع شخص بقطر يتولي تكاليف تأه‍يلي وفعلا ده حصل لمدة شهرين فقط، لكن بعدها تم إبلاغي أن استكمال التأهيل هيبقى على حسابي وحاولت اتواصل مع النادي ومبقاش حد يرد عليا تماما وده كان سبب تأخيري في العودة، ومسئولو الإسماعيلى حولولي مبلغ بسيط كنت فاكره جزء من تكاليف العلاج، لكن طلع جزء من عقدي ولو قولت على المبلغ اللي حولوه هصعب عليكوا ورغم كده لما خلصت رجعت على الملعب مع كابتن تامر في الدور التاني".

وواصل: كانوا بيبلغوني طول الدور التاني أننا هنقعد ومحتاجينك للموسم الجديد ودلوقتي محدش بيكلمني تماما ولا فيه أي تواصل رغم أن ليا مستحقات قديمة وجديدة متصرفتليش غير تكاليف العلاج، والتجديد صعب لأنه محدش كلمني في تجديد وفكرة إنك مستني القيد تشوفه يفتح أو يقفل عشان تجددلي دي مهينة للأسف وأكرملي أقعد في البيت