حكاية إنسانية اسمها «عماد».. كيف عاد شاب لأسرته بعد فقدانه 12 سنة؟
يعتمد دائما مؤلف الدراما، على القصص الواقعية، في عرض المشاكل والحالات الإنسانية والتي تمس القضايا المجتمعية، وفي هذه المرة قصة نشر تفاصيلها صفحة «أطفال مفقوده»، عن شاب من محافظة الجيزة، فقد أسرته منذ 13 سنة، بعد تعرضه لحادث بمحافظة الإسكندرية، وعاد لأهله بسبب منشور، وتشابه في الملامح مع أخر.
بداية القصة
القصة كما نشرها المهندس رامي الجبالي، أدمن ومؤسس صفحة «أطفال مفقوده»، بدأت بتعرض شاب يدعى «عماد» لحادث في في 2013، ولديه صعوبة في النطق، ولا يعرف غير اسمه الأول، ويتكفل به العاملين بمستشفى في الإسكندرية، ويعتبرونه أحد أفراد أسرتهم، وبعد مرور ما يقرب من 12 عام، نشرت الصفحة على السوشيال إليها بوست جديد بصورة لشاب مفقود، ليظهر شاب ويخبر المسئولين أنه يعلم أسرته، ويرسل لهم رقم هاتف شقيق الشاب المنشور صورته، ليفاجئوا بانه يتعرف على «عماد»، ويخبرهم أنه هو شقيقه المفقود من 12 سنة.
قصة واقعية
تفاصيل الواقعة نشرها أدمن ومؤسس صفحة «أطفال مفقوده» كالتالي:
«المشرد ده مش أخويا، بس التاني ده هو اللي أخويا، عاوزين تعرفوا الحكايه، لازم أحكي لكم الحكاية من البدايه ، حكايتنا المره دي فيها تفاصيل لو إتعادت ١٠٠ مره، مش هتكون دي النتيجه، و يرجع مفقود لأهله بعد أكثر من ١٣ سنه، سنة ٢٠١٦ تواصل معانا مسؤلين من المستشفي العام في الإسكندرية عشان يطلبوا مننا نساعدهم في العثور علي أهل مريض عندهم في المستشفي بقاله أكثر من سنتين، بعتوا لنا صورته (رقم ١) و بلغونا إن المريض دخل المستشفي في حادثه، و عنده صعوبه في النطق و بالعافيه بيقول ان إسمه عماد، وواضح إنه بيعاني من مشاكل نفسيه.
موظفين المستشفي الطيبين، حبوا عماد بعد ما عالجوه وعاش وسطهم سنين في المستشفي ... فأصبح كل موظف بيستضيف عماد في وسط بيته و أسرته كام يوم لحد ما يعثروا علي أهله ... بس بعد ٣ سنين قالوا ما نبعت لصفحة أطفال مفقوده يمكن أهله بيدوروا عليه، وفعلا بعتوا لنا صورته رقم (١).
وفعلا بدأنا ننشر صورته من ٢٠١٦ و لحد من أسبوع بدون توقف، وكمان بدون ما حد يتعرف عليه للاسف !
من إسبوع بقي، جالنا صوره الشاب رقم (2)، حد بيقول لنا انه شافه و صوره مشرد في الشارع، فقولنا يا عيني، ده عماد بتاع المستشفي، وموظفين المستشفى أكيد تعبوا من مسؤليه عماد و رموه في الشارع .. و عشان كده شكله إتبهدل.
تواصلنا مع مسؤل المستشفي اللي ارسل لنا من ٩ سنين صوره عماد عشان نقوله ليه تخليتوا عن عماد، حرام رميته في الشارع كده، فوجئنا ان الحساب اللي بعت لنا الصوره إتقفل، و كل الكلام اللي بيننا و بينه إتمسح المهم نشرنا صورته مشرد و قولنا يمكن نوصل لأهله المره دي !
نقوم لاقي تعليق علي صورة المشرد بيقول الراجل ده قريب واحد صاحبي إسمه عماد من #الجيزة و مفقود فعلا من سنه ٢٠١٣ هديكم رقم أخوه، فرحنا أوي أخيرا وصلنا لأسرة عماد بتاع المستشفي بعد ٩ سنين ... بس يا خساره ... دلوقت هو مشرد في الشوارع و أكيد هندور عليه بصعوبه.
وفعلا أخو عماد تواصل معانا تعرفوا قال لنا إيه ؟ المشرد ده مش أخويا بس التاني ده هو اللي أخويا ، فكان ردنا لأ يا فندم هو بس ١٠ سنين فاتت وأكيد شكله في الشارع إتغير هو ده أخوك دا حتي صاحبك قال انه أخوك ! لا ده مش أخويا، وبتاع المستشفي هو اللي أخويا.
نزلنا نداء لموظفين المستشفي العام في الإسكندرية، عاوزين حد من الموظفين الطيبين اللي يعرفوا عماد و عاش معاهم زمان يتواصلوا معانا عشان يتأكدوا لنا إن صوره المشرد رقم (٢) دي هي صوره عماد بعد ٩ سنين.
و فعلا يتواصل معانا موظفين من المستشفي العام و يقولوا لنا اللي مكانش ممكن يخطر علي بالنا و لا نصدقه !
عماد ... عماد إحنا عمرنا ما رميناه في الشارع، و لا عمرنا هنرميه في الشارع، عماد أصبح قريب موظفين كثير في المستشفي و عايش وسط أهالينا و بيتحرك بين بيوتنا بقاله ٩ سنين و هو بخير الحمد لله ولسه عايش معانا لحد دلوقت عاوزين ايه من عماد ؟
صدمه والله إيه الجمال ده إستضافوا شاب ميعرفهوش اكثر من ١٣ سنه لله !!
قولنا لهم " طيب مبروك إحنا وصلنا لأسرة عماد بعد ٩ سنين بحث عنهم " وبالفعل أسرة عماد بتستلمه منهم دلوقت.
القصه الجميله دي البطل فيها ناس كثير، بداية من موظفين المستشفي اللي مفيش كلام يوفيهم حقهم، ومرورا بالشخص اللي صور شاب مشرد غلبان في الشارع عشان نحاول نساعده والأخ اللي حس بأخوه من صورته حتي بعد كل السنين دي وإنتهاء بالمشرد نفسه اللي بسبب الشبه اللي بينه و بين عماد، عمرنا ما كنا هنوصل لأسرة عماد بتاع المستشفي ! صورة عماد بعد السنين دي كلها في التعليقات .
وأخيرا، إحنا مش بنقول مفيش فايده عندنا أمل نطبطب علي قلوب كل أهالي المفقودين لما نرجع لهم ولادهم وكمان انشروا البوست ده يمكن نعرف نوصل لأهله المشرد اللي منعرفش هو مين لحد دلوقت وتبقي الفرحه فرحتين».
