أحمد ربيع: انتقالي للزمالك تعطل بسبب إيقاف القيد والبنك الأهلي أنقذني
كشف أحمد ربيع، لاعب وسط نادي البنك الأهلي، عن كواليس فشل انتقاله إلى الزمالك، وتفاصيل رحلته من دوري الدرجة الثانية إلى التألق في الدوري الممتاز، مؤكدًا أن الأقدار كانت خير دليل على أن كل تأخير يحمل في طياته الخير.
وفي تصريحاته عبر برنامج "نجوم دوري نايل" مع الإعلامي أحمد المصري على إذاعة "أون سبورت إف إم"، تحدث أحمد ربيع بصراحة عن مرحلة انتقالية في مسيرته قائلًا: "بالفعل كانت هناك مفاوضات جادة مع نادي الزمالك، لكن قرار الفيفا بوقف القيد عن النادي كان السبب المباشر في توقف كل شيء". وأضاف: "أنا مؤمن أن كل حاجة بتحصل لسبب، وربنا كرمني في نفس التوقيت بعرض من البنك الأهلي، اللي كان نقطة تحول مهمة جدًا في مسيرتي".
تحديا شخصيا
وأوضح لاعب خط الوسط الطموح، أن انضمامه للبنك الأهلي لم يكن مجرد محطة انتقالية، بل كان تحديًا شخصيًا: "حطيت هدف كبير قدامي من أول يوم، وهو إني أقدّم موسم قوي يخليني مرشح للانضمام لمنتخب مصر، وبعد كده أفكر في خطوة الأهلي أو الزمالك، أو حتى الاحتراف الخارجي".
وتابع: "بدايتي مع البنك الأهلي ما كانتش سهلة، كنت جاي من نادي السكة الحديد، وهو نادٍ كبير وله احترامه، لكنه من الدرجة الثانية، والانتقال مباشرة لدوري الأضواء بيكون مليان ضغوط وتحديات. لكن استقبال الجهاز الفني بقيادة الكابتن طارق مصطفى واللاعيبة لي من أول يوم فرّق معايا جدًا، وساعدني أتجاوز رهبة البداية".
تطور كرة القدم
وأشار ربيع إلى أن تطور كرة القدم حاليًا يتطلب مزج المهارة بالقوة البدنية، قائلاً: "النهاردة الكرة محتاجة لاعب ذكي وقوي في نفس الوقت، ومش بس بيعتمد على المهارة. شوفنا إزاي لاعبين زي بيدري ورودري بيبقوا نجوم عالميين، لأنهم بيجمعوا كل المقومات دي".
وعن فرصه في تمثيل منتخب مصر، قال: "أنا شايف إن حسام حسن بيدي فرص عادلة لكل لاعبي الدوري، وبيتفرج على كل الفرق، وده بيخلينا كلاعبين نحس إن عندنا فرصة حقيقية، حتى لو مش في نادي جماهيري".
وخصّ بالشكر مدربه الحالي، فقال: "الكابتن طارق مصطفى مش بس مدير فني، ده أب بالنسبة لي. اشتغل معايا كتير وصدق فيا، وهو السبب بعد ربنا في المستوى اللي وصلت له".
نهائي كأس العاصمة
أما عن مباراة نهائي كأس العاصمة، والتي خسرها البنك الأهلي، فوجه ربيع رسالة مؤثرة لزملائه: "عملتوا اللي عليكم ومقصرتوش، وأنا فخور باللي قدمناه، وإن شاء الله نبني على اللي عملناه الموسم ده في اللي جاي".
وحول مستقبله، قال أحمد ربيع: "أكيد شرف كبير لأي لاعب يبقى في مفاوضات مع الأهلي أو الزمالك. لكن أنا مرتبط حاليًا بعقد مع البنك الأهلي، وأي حاجة بتحصل بتكون بين النادي ووكيل أعمالي. أنا جاهز لأي تحدي، واللي ييجي من ربنا كويس".
واختتم لاعب وسط البنك الأهلي حديثه متطرقًا إلى حياته خارج الملعب، قائلاً: "الاستقرار في حياة اللاعب عنصر مهم. أنا من الفيوم، لكن عايش في القاهرة مع عيلتي، وده كان له دور كبير في تألقي خلال الموسمين اللي فاتوا".
