هشام ماجد يوجه رسالة للمخرج خالد دياب و شيرين دياب
وجه الفنان هشام ماجد ، رسالة لـ المخرج خالد دياب و للمؤلفة شيرين دياب بعد انتهاء تصوير مسلسل اشغال شقة ونشر فيديو من كواليس انتهاء التصوير عبر حسابة بموقع “ انستجرام ” .
وكتب هشام ماجد “ شكرا أستاذ خالد دياب أكتر واحد مخلص و مجتهد شوفته في حياتي … الشغل معاك مًُتعب و مُمتع في نفس الوقت … تستاهل كل النجاح يا استاذ … و شكرا طبعا مؤلفتنا العبقرية شيرين دياب أساس كل حاجة حلوة فالمسلسل ” .
ويذكران كشف المخرج محمد دياب شقيق المخرج خالد دياب عن الصعوبات التي واجهت مسلسل “ اشغال شقة ” قبل تصويرة .
وكتب محمد دياب عبر صفحته الرسمية بموقع فيسبوك: الحمد لله أشغال شقة للسنة التانية ينجح نجاح ساحق، بس ورا النجاح ده قصة.
«أشغال شقة»… معظم ممثلين مصر رفضوه
وتابع: "أشغال شقة ده لمدة خمس سنين بيتعرض علي منتجين مصر كلهم ولكن مكانش فيه حماس ليه، تقريبا معظم ممثلين مصر رفضوه رجاله و ستات، ولما مره نجم كبير تحمسله و مضاه فضل يطلب تغييرات لدرجه انه في الآخر طلب ان شغل البطل يتغير و تتشال فكره الشغالات".
وأشار “ في ناس مكانتش عاجباها الفكره و ناس كانت شايفة اننا بنكتب جد فمش هنعرف نعمل كوميدي، و ناس عايزه الفكرة بس اللي يخرجها حد تاني غير خالد".
وأكد “رد الفعل ده كان هيجنن خالد وشيرين، احساس صعب لما تبقي مؤمن بحاجه واللي حواليك مش شايفنها، ساعات ده بيشككك في نفسك”.
واستكمل " اربع سنين تعدي و مينزلش لخالد و شيرين أي مشروع، الضغط خلى خالد يقبل أن «أشغال شقة» يتعمل و لو بمخرج تاني ، خالد لأي حد يعرفه هو اكتر انسان كوميدي تقدر تعرفه و انا وشيرين كان عندنا قناعه انه من اشغال شقه هيطلع كوميديته الخاصه اللي هتكسر الدنيا.
وأضاف “ بصعوبة شديدة رجع خالد و شيرين يحاولوا ورا المسلسل، لغاية لما جه هشام ماجد اللي آمن بيه و بخالد كمخرج و جت شركه الأنتاج
(اي برودسيرز) اللي هيأتله اسباب النجاح”.
واكد “ أشغال شقة نجح واستخدم توليفه كتابيه مختلفه مش قايمة عالإيفيهات، و خالد كمخرج طلع عنده صوت و شخصية و رؤية بصريه باينة في كل مشهد، انا طول عمري بتفرج علي كوميديا المسلسلات و ابتسم كام مره و ابقي مرضي، بس ان الواحد يضحك بصوت و لغايه لما بطنه توجعه و ده يحصل كل حلقه، فمتخيلتهاش تحصل في مسلسل”.
واختتم “ بالنسبالي المخرج والمؤلف الشاطرين هما اللي بيعملوا حاجه احس اني معرفش اعملها و انا لما بتفرج علي اشغال شقه ببقي متأكد اني معرفش اعمل منه مشهد ، فعلاً كل تأخيره و فيها خيره ”.
