شوبير: الأهلي عاقب تريزيجيه بسبب ركلة الجزاء ودكة الأحمر محتاجة تتظبط
أكد الإعلامي أحمد شوبير، أن الأهلي قام بتوقيع عقوبة على تريزيجيه لاعب الفريق عقب اهداره ركلة جزاء أمام إنتر ميامي الأمريكي في افتتاح بطولة كأس العالم للأندية.
تصريحات شوبير
وقال شوبير في تصريحات إذاعية: تريزيجيه اعتذر بعد الإصرار على تنفيذ ركلة الجزاء، وتم تغريمه والأهلي ما أعلنش بشكل رسمي، ولكن اللاعب اتغرم واعتذر، وهو كان عنده أمل إنه يسجل الهدف الأول ولكن خلاص انتهى الأمر .
وأضاف: دكة الأهلي عايزة تتظبط ، انت قاعد على الدكة عشان تنزل تغيّر النتيجة لصالحي مش تبقى عليا وتعمل ضغط عليا ومش أنا اللي اتضغط، ودا محصلش في تغييرات ريبيرو أمام إنتر ميامي، ومهم جدًا إن اللي ينزل من على دكة البدلاء ينزل عشان يغيّر النتيجة.
وتابع: عجبني زيزو جدًا لما نزل غيّر شكل الأهلي في الملعب وحاول كثيرًا، وموضوع تغييره بسبب إن ريبيرو رأى أن زيزو لعب 65 دقيقة وهو مكنش عامل حسابه إنه يلاعبه كل الدقائق دي، وقرر إنه يبدله كأن زيزو بدأ المباراة وخرج في الدقيقة 65 وزيزو تقبل الأمر جدًا ولم يغضب.
وواصل: إنفانتينو كان في حالة انبهار شديد بـ جماهير النادي الأهلي في مباراة إنتر ميامي الأمريكي، وقال إنه كان خائف إن الجمهور ميبقاش كتير ولكنه تفاجأ أن جمهور الأهلي 80% وأكثر من صاحب الملعب وقال إن هذا النادي عظيم، كان هناك تبادل للدروع والهدايا بينه وبين خالد مرتجي رئيس البعثة، والجماهير المصرية عامة والأهلي خاصة تصنع الفارق في أي مكان.
وشدد: هناك أشخاص عديدة للغاية من إنتر ميامي اتصوروا معايا، فـ قولتلهم هو انتم تعرفوني قالولي سألنا عليك وعرفنا إنك حارس كبير سابق في النادي الأهلي فـ احنا مبسوطين، وأنا كنت فرحان جدًا بقيمة النادي الأهلي وقيمة مصر، في أسوياء كتير.. وكان هناك العشرات ممن يرتدون قميص الزمالك والمصري والإسماعيلي يدعمون النادي الأهلي وكانوا في حالة حزن شديدة جدًا لما ضربة الجزاء ضاعت، ولما الأهلي تعادل.
وأكمل: الصورة التي انتشرت لمشجع زمالكاوي يدعم إنتر ميامي فـ ياريت منسلطش الضوء عليها ومنتضايقش لأنه مغلطش في حقنا في حاجة وهو حر لو زمالكاوي ومش عايز الأهلي يكسب لأن تركيبته كدة ودماغه كدة.
وعن فرصة حسين الشحات الضائعة أمام إنتر ميامي قال شوبير: حسين الشحات الدنيا مقلوبة عليه وهو أخطأ بالفعل لأنه انطلق بطريقة رائعة من منتصف الملعب، وحسين ذكي جدًا في المواقف دي، ولكن جانبه الصواب، واللاعب لم ينظر يمينه ولا يساره وفي دماغه عايز يجيب جون لعدة أسباب أولها إنه بدأ يجلس على مقاعد البدلاء فـ يريد إثبات ذاته لـ ريبيرو، وثاني الأسباب أنه يريد الانفراد بصدارة الهدافين التاريخيين لمسابقة كأس العالم للأندية، والأهم اللي كان عند الشحات إنه كان عايز يثبت نفسه عشان كدة كانت كل الأفكار في دماغه في الكرة الأخيرة.
وأختتم: كانت النتيجة إنه لا شاط ولا مرر ولا باصى ولا رقص ولا عمل أي حاجة؛ لأنه مكانش شايف ومش عايز يبص يمينه ولا شماله.
