ردّ قاسي من الفنانة المعتزلة عبير الشرقاوي على حلا شيحة
كشفت الفنانة عبير الشرقاوي عن حالة التردد التي تمر بها الفنانة حلا شيحة في مسألة ارتداء الحجاب، مؤكدة أن الأمر طبيعي، خاصة في ظل ما يمر به الإنسان من تقلبات نفسية وروحية.
وأضافت الفنانة عبير الشرقاوي، فى مداخلة هاتفية مع برنامج "تفاصيل" مع الإعلامية نهال طايل على قناة صدى البلد 2: "عادي جدًا التردد في لبس الحجاب، وبفكر الناس إن في أيام الصحابة كان في ناس ارتدوا عن الإسلام ورجعوا تاني، وأنا مش بقارن، بس بقول إن ده شيء طبيعي".
وقالت عبير الشرقاوى: "ربنا يكون في عونها، هي محتاجة تبقى أقوى من كده، والفتنة ممكن تيجي لأي حد، ومحدش كبير عليها، كلنا معرضين لابتلاءات وضعف، والمهم في الآخر الإنسان يرجع لربنا بقلب صادق".
مصدر الحماية والدعم
وبشأن علاقتها بوالدها، أوضحت عبير الشرقاوى، أنه كان مصدر الحماية والدعم في حياتها، قائلة: "بابا كان جيشي، كان بيحميني بطريقة مشوفتهاش في حد تاني، وفاكرة وأنا صغيرة كنت بتمشى وواحدة زعقتلي، روحتله وأنا بعيط، جابلي حقي في ساعتها".
خلافها مع والدها بسبب زواجها
وتطرقت عبير، إلى خلافها مع والدها بسبب زواجها، قائلة: "بابا قسي عليا لما اتجوزت لأنه مكنش موافق على الجوازة، وأنا ما سمعتش كلامه، وفعلاً طلع عنده حق بنسبة 60%، لكن اللي زعلني أنه مخضش المشوار ده معايا حتى لو شايفني غلط".
كواليس أولى تجاربها المسرحية
وأوضحت الفنانة عبير الشرقاوي، كواليس أولى تجاربها المسرحية، مؤكدة أن مشاركتها في مسرحية "عطية الإرهابية" كانت تجربة صعبة ومرعبة بالنسبة لها، خاصة أنها جاءت بشكل مفاجئ أثناء دراستها للمسرح والتمثيل في الجامعة الأمريكية.
وأكدت عبير الشرقاوي: "كنت لسه بدرس في الجامعة، وفجأة لقيت بابا بيقولي هتحلي المأذق اللي أنا فيه وهتاخدي مكان سهير البابلي في المسرحية، والافتتاح بعد 4 أيام، فمفيش وقت إذاكر أو أحضر".
بداية مشوارها الفني
وأوضحت أن والدها المخرج الراحل جلال الشرقاوي، دعمها بشكل كبير في بداية مشوارها الفني، وساهم في شهرتها حين دعا كبار الفنانين لحضور العرض الأول للمسرحية، قائلة: "بابا عزِم كل فنانين مصر، وكان من ضمنهم الزعيم عادل إمام اللي طلع على المسرح، ومسك إيدي ورفعها قدام الجمهور عشان يشجعني".
