انتصار: الستات في الصعيد مدربين على الظروف الصعبة مش زي وجه بحري

تحدثت الفنانة  انتصار عن صفات الصعايدة، مؤكدة أنهم يتميزون بصفات قوية وقدرة عالية على تحمل المسؤولية، كما أكدت أن المرأة في الصعيد لا تعرف الدلع والنعومة وتربت على تحمل الظروف الصعبة.

الصعايدة جاديين وبيتحملوا المسؤولية

وقالت انتصار في لقاء تلفزيوني: “الصعايدة جاديين وقاسين على نفسهم.. بيتحملوا المسؤولية حتى لو هيموتوا أو يتسجنوا أو يتعاقبوا زي فكرة التار أنت بضيع نفسك علشان العيلة لأن العيلة بالنسبة لهم نمبر وان، وعندهم استماتة من أجل الأسرة.. الأسرة هي العزوة بالنسبة لهم علشان كده محدش بينفصل عن أبوه وأمه وأخواته، الصعيدي عنده احترام غير عادي للأب والأم والكبير”.

وأضافت: “الصعيدي بيشتغل علشان أسرته مش مراته وعياله فقط.. ولما الأب يتوفى الولد الكبير بيحل محل الأب وما يتجوزش إلا لما يجوز أخواته”.

الستات الصعايدة معندهمش دلع ونعومة

وتابعت انتصار:"الستات في الصعيد معندهمش دلع ونعومة بالعكس جامدين ومدربين على الظروف الصعبة مش زي وجه بحري".

الصعيدية واخدة حقها مليون في المية

وأكدت انتصار أن المرأة الصعيدية تحصل على حقوقها: “الست في الصعيد واخدة حقها مليون في المية، الصعايدة بيدوها حقها ومش بيجوا عليها.. علشان كده تلاقي الأم والجدة حاكمة على بيتها وولادها وأزواج بناتها”.

كما أثارت انتصار الجدل بقولها: محافظتي بني سويف والمنيا لا تُعدان من الصعيد، حيث قالت :"بني سويف والمنيا مش محسوبين على الصعيد واللي يزعل يزعل، مضيفة: "أنا صريحة وواضحة لأني صعيدية من الأقصر، والصعايدة ما بيخافوش لو عندهم حاجة هيقولوها من غير لف ودوران ولا مصلحة".