خبير اقتصادى: آن الأوان لإصدار قانون يلزم كل بيت باستخدام الطاقة الشمسية
أكد الخبيرالاقتصادي عبدالحميد أحمد حمدى، الرئيس التنفيذي لشركة EMG للغاز، على ضرورة استخدام الطاقة الشمسية في مصر بشكل إلزامي الفترة المقبلة.
وكتب حمدي، عبر صفحته الشخصية على منصة "إكس": "آن الأوان أن تتخذ مصر خطوة جدية وتصدر قانون واضح يلزم كل بيت جديد يركب سخان شمسي على الأقل".
مقارنة للصالح العام
وأضاف حمدي: "مقارنة بسيطة يمكن تضايق البعض بس يمكن تفتح عيوننا، وعيون المشرعين، مصر عدد سكانها حوالي 110 مليون، ومساحتها أكتر من مليون كم٢، وإنتاجها من الطاقة الشمسية حوالي 1631 ميغاواط، لكن البيوت اللي فيها سخانات أو ألواح شمسية عددهم قليل جدا، والمشاركة لسه محدودة جدا، إسرائيل عدد سكانها حوالي ٩ مليون ومساحتها ٢٢ ألف كم٢، لكن إنتاجها من الطاقة الشمسية يوصل لـ٩٨٠٠ ميغاواط، عندهم حوالي ٢.٦ مليون منزل، منهم ٢.٢ مليون مركب سخانات شمسية، يعني ٨٥٪ من البيوت عندها سخانات شمسيه، الرقم دا وصلوا له فقط، بسبب القانون اللي صدر من السبعينات يعني من اكثر من ٢٥ سنه- عندهم قانون بيلزم أي مبنى جديد يركب سخان شمسي (ما عدا الأبراج العالية)- بما فيها الفنادق ملزمه تركبها".
وتابع قائلا : " أصبح عندهم أكتر من ١٠٠ ألف منزل شغالين بالكامل بالطاقة الشمسية، مع خطة توصل لـ٣٠٪ من البيوت بحلول ٢٠٣٠- ولأنهم بدأوا من بدري وبقانون واضح!، وفروا أكتر من ٩ مليار دولار في ٢٠ سنة بس من بند وحيد وهو بند تسخين المياه بالبيوت، وفروا على البيئة حوالي ٣٨ مليون طن من ثاني أكسيد الكربون، وده بيعادل تلوث ناتج عن حرق ملايين البراميل من البترول- برضة من بند تسخين المياه، علشان نعوض الكمية دي من التلوث، نحتاج نزرع حوالي ٩١ مليون شجرة تعيش ٢٠ سنة، إسرائيل عندها ٢٤٠ مليون شجرة، للاسف مفيش ارقام عن تعداد الشجر بمصر او يمكن موجوده ولكن غير متاحة علي الانترنت بتقارير مؤكدة".
وأكد الخبيرالاقتصادي عبدالحميد أحمد حمدى، الرئيس التنفيذي لشركة EMG للغاز قائلا "أنا قارنت فقط البيوت ولم ادخل في تفاصيل البنود الاخري، مصر عندها ميزه طبيعيه مش عند حد وهي معدل الاشعاع الشمسي، معدل إنتاج مصر من الإشعاع الشمسي أعلى من إسرائيل بحوالي ٣٠٪ واعلي من غالبيه الدول، إحنا مش ناقصنا شمس، إحنا ناقصنا قانون، لو اتحركنا بقانون يلزم تركيب السخانات الشمسية، وشجعنا تركيب الألواح، وخلينا إعلانات الشوارع تشتغل بالطاقة الشمسية أو تكون عاكسة للضوء، وسهلنا الإجراءات، هنقدر نوفر مليارات، وننضف الهوا، ونبني مستقبل أحسن لولادنا".
واختتم "أتمنى من السادة النواب اللي متابعني، واللي أعرفهم ويعرفوني خصوصا من تويتر، إن المقارنة دي تكون دافع حقيقي ليهم علشان يتحركوا ويصدروا قوانين تلزم الناس ولكن الالزام يكون معاه تسهيلات، زي ما دول تانية سبقتنا بسنين، مصر تستحق تبقى في المقدمة، وتستحق كل الخير".
