"رزق ولادي".. هند سعيد صالح تستغيث بالرئيس السيسي لإنقاذ زوجها من فقد عمله

وجّهت الفنانة والمونتيرة هند سعيد صالح، ابنة الفنان الراحل سعيد صالح، رسالة مؤثرة إلى الرئيس عبد الفتاح السيسي وحرمه السيدة انتصار السيسي، ناشدت فيها التدخل لحل أزمة زوجها محمد بكري، مدير إدارة الإعداد والتنفيذ السابق في قنوات ONTV والحياة، والذي تم فصله بشكل مفاجئ من مشروع تطوير التليفزيون دون سابق إنذار أو تعويض.

رسالة هند سعيد صالح 

وقالت هند في رسالتها: “ بالتأكيد آخر حاجة كنت أتمناها إن وسط مشاغله الكبيرة وهموم البلد اللي شايلها فوق كتافه إنى أزعج سيادة الرئيس والسيدة حرمه بمشكلة "تبدو شخصية” .. لكن كل اللي في الوسط الإعلامى متأكدين من صحة كلامي.

للأسف كل السكك اتقفلت في وشي بعد محاولات عديدة مني و من زوجي للتواصل مع بعض قيادات المتحدة للوصول لحل و إرجاع الحق لأصحابه، ملقتش حل تاني غير أني أعرض المشكلة على سيادة الرئيس والسيدة حرمه طالما المسئولين المباشرين بياخدوا القرارات بدون مراعاة لتضرر الموظفين الأصغر منهم.. وكأن الموظفين دول ملهمش حقوق وملهمش عائلات وأولاد بيتضرروا من القرارات اللي تبدو تنظيمية لكنها بتسيب وراها ضحايا فى كل اتجاه.

سيادة رئيس الجمهورية / عبد الفتاح السيسي..  السيدة حرم رئيس الجمهورية انتصار السيسي: الحكاية باختصار شديد أن زوجي  محمد بكري كان يعمل مدير إدارة الإعداد و لتنفيذ لشبكتي تليفزيون ONTV و الحياة ( OTV من سنة 2006 واللى تم تغيير اسمها لتصبح ON  TV .. ثم انضمت لإدارته شبكة قنوات الحياة في 2018، فى سنة 2020  تم نقله للقناة الأولى والفضائية المصرية بعد انضمامهم للشركة المتحدة ضمن مشروع تطوير التليفزيون.. وخلال الفترة دي لم تنقطع علاقته بالشركة المتحدة حيث لازال مؤمن عليه في قناة ONTV اللى بيشتغل فيها من 2006 قبل بدء انطلاقها واللى عقده معاها لا يزال سارى.. ده غير إنه ساهم فى تأسيس وإطلاق القناة الوثائقية سنة 2023"

 وتابعت: “فجأة و بدون مقدمات يوم 17 إبريل 2025 تم إبلاغ العاملين بمشروع التطوير أنه تم فصل القناة الأولى والفضائية عن المتحدة من يوم 1 أبريل لتصبح تحت إدارة الهيئة الوطنية للإعلام، وأن العاملين بمشروع التطوير ملهمش أي علاقة بالمتحدة حاليا، حتى الزيادة السنوية تم تطبيقها بعد ما فصلوا الجهتين عن بعض وتم تطبيقها بأثر رجعى من بداية العام .. فأصبحوا تابعين للهيئة الوطنية للإعلام ( بدون عقود .. بدون زيادة سنوية .. بدون تأمين طبى .. بدون أي شئ يثبت في الأساس أنهم بيشتغلوا في تليفزيون الدولة، لو كان زوجى مدير إعداد و تنفيذ غير كفء مكنش هينضم له شبكة قنوات الحياة 2018 بجانب On TV، ومكنش هيتم اختياره وفريق عمله قبل بداية بث وانطلاق قنوات تليفزيونية كبيرة سواء تحت إدارة المتحدة أو لا واللي عددها وصل لحوالي 10 قنوات".


 وأكدت:  سيادة الرئيس "الأب"، سيادة حرم الرئيس "الأم"، مطلبي الوحيد هو الأمان  الاستقرار.. زوجى هو العائل الوحيد للأسرة و أنا عمري ما اشتكيت إني بقالي 10 سنين بحاول اشتغل شغلنتى اللي واخدة فيها شهادتى من المعهد العالى للسينما وهي المونتاج ومش عارفة اشتغل.. وسعيت وكلمت كل الناس ودايما بيوعدوني بالخير وبردو مابشتغلش.. بقيت أقول مش مهم أنا ليه مستثناه من كم الأعمال الدرامية اللى بتُنتج سنويا المهم أن زوجى مستقر في شغله.. لكن كده كمان حتى زوجي مش هيقدر يعول الأسرة”.
 

واختتمت رسالتها: كلمنا كل اللي ممكن نوصل لهم أننا مش عايزين إلا حق رجوعه لقناته الأم بنفس مزاياه الوظيفية والمالية.. أو إنهاء عقده بعد 19 سنة عمل مع مكافأة نهاية الخدمة.. لكن باختصار محدش شايفنا ولا سامعنا.. ومحدش قادر ياخد القرار.. عشان كدة بكلم سيادتكم باعتباركم أب و أم لينا كلنا.. يا ريت يا فندم توجه بالنظر لحالة محمد بكري وحالات تانية أكيد اتعرضت لنفس الموقف، اللي بحكيه ده مش أهم حاجة بتحصل في الدولة.. لكنه أهم حاجة فى حياتى.. رزق بيتى و أولادي اللي مالناش مصدر غيره، أنا متاكدة يا سيادة الرئيس إن سيادتك وسط مشاغلك الكتير مش هاتخذلنا .. وهتبقى في ضهرنا زي ما سيادتك عودتنا دايما، حفظكم الله وحفظ مصر العزيزة من كل شر”