مالك العيادة البيطرية في واقعة مشيرة إسماعيل: رجعنا بشكل أقوى ورسالة أوسع
في تعليق جديد، أكد الدكتور أحمد النبراوي، مالك العيادة البيطرية بحي مصر الجديدة، والواقعة في نفس العقار الذي تقيم فيه الفنانة مشيرة إسماعيل، أنهم مروا بأيام صعبة، لكنهم لم يتراجعوا، وعادوا أقوى بعد فوزهم بما وصفه بـ المعركة.
وكتب أحمد النبراوي عبر حسابه الرسمي بموقع فيسبوك: “كانت أيام عصيبة وصعبة… لكن ربنا كان معانا في كل خطوة.كنا بنمشي في طريق ، ما بين قرارات تعسفية، ضغوط غير مبررة، بس ربنا، كان في صف الحق”.
صوتنا رجع أعلى وأثبتنا إن الرحمة مش جريمة
وأضاف مالك العيادة البيطرية: "اللي حصل ماكانش مجرد خلاف إداري أو إجراء قانوني…اللي حصل كان معركة حقيقية بين اللي بيشتغل بضمير، وبين اللي اتعود يكمم أي صوت مش على مزاجه. كنا بنواجه ، “سلطة” مش شايفانا، و”واقع” مش منصف لا لينا ولا للحيوانات. دفعنا التمن من راحة بالنا، ووقتنا… لكن ما تراجعناش، صوتنا رجع أعلى، أثبتنا إن الرحمة مش جريمة، وإن الطبيب البيطري مش لوحده".
علاج الحيوانات هو واجب،مش رفاهية
وتابع: "وجود عيادة بيطرية محترمة، متاحة، وبتشتغل بضمير هو حق مش مكرُمة، ولا فضل من حد، وعلاج الحيوانات هو واجب،مش رفاهية
بعد سنين من التجاهل، من غياب القوانين اللي تحمينا، ومن نقابة ضعيفة مش قادرة تواجه…بنعلن بداية عصر جديد، عصر يكون فيه للطبيب البيطري ظهر وسند.نقابة تقف ورا كل دكتور بيشتغل بضمير، عصر ما نتهددش فيه كل ما ننجح أو نكون مختلفين. عصر يتسمع فيه صوت الحيوان اللي مابيعرفش يشتكي، ويتسمع فيه صوتنا إحنا اللي بنتكلم باسمه".
وأكمل: “لكن، وسط كل ده ، أكتشفنا…إن الوقت كاشف…وشوش كانت حوالينا، بس مش معانا.ضحكة كانت مستنيّة أول هزة علشان تبان شماتتها. وفي لحظة الحقيقة، الكل اتعرّى، كمان عرفنا كمان مين كان معانا من قلبه، من غير ما يستنى مقابل، واللي وقفوا جنبنا، عمرنا ما هننساهم…وهييجي اليوم اللي نرد فيه الجميل، وبالطريقة اللي تليق بيهم”.
واختتم: “المعركة دي كانت اختبار. مكنّاش لوحدنا، وكان حوالينا قلوب بيضة، ونفوس حقيقية، وناس شافت فينا أمل مش لازم يموت، وإحنا كسبنا احترام، كسبنا دعم، كسبنا قلوب…واتعرفنا للي مكنش يعرفنا، واتسمع صوتنا عند اللي ماكانش بيسمعنا. رجعتنا بس بشكل أقوى، ورسالة أوسع، وإيمان أعمق. والمعركة دي؟ كانت مجرد بداية”.
كانت العيادة البيطرية قد أغلقت مؤخرًا بعد عدة شكاوى تقدمت بها الفنانة مشيرة إسماعيل لمحافظ القاهرة ورئاسة مجلس الوزارء، قبل أن يتم إعادة فتحها مجددًا، وسبق أن كشف مالكوا العيادة أن الفنانة مستمرة في الشكاوى ضدهم وتصر على غلق العيادة.
