تشوف بقلبك .. هبة السويدي تشكر فريق عمل مستشفي أهل مصر

اشادت هبة السويدي رئيس مجلس أمناء مستشفى اهل مصر بفريق عمل المستشفي . 

وكتبت هبه عبر حسابها الشخصي فيس بوك : “  رحلة ” أهل مصر” علمتني دروس كثيرة… وأهمها إنك تشوف بقلبك مش بعينك! من سنين، بدأنا تصوير أغنية “شوف بقلبك” بعد ما اتخذت قرار بناء #مستشفى _ أهل _ مصر _ لعلاج _ الحروق؛ كل اللي شارك في العمل كان بيحس بحالة من الحب، الرحمة، السكينة والفرحة… والجميل إن نفس الإحساس اتكرر لما صورناها تاني، لكن المرة دي داخل المستشفى، بين المرضى والناجين من الحروق، في المكان اللي كان حلم وبقى واقع.

من حوالي 5 شهور، كنت في اجتماع في المستشفى وقلت: “نفسي نعمل شوف بقلبك تاني، بس المرة دي من داخل المستشفى”؛ وبعد شهرين، لما كنا بنخطط لإعلانات رمضان، جالي عمران وندى من شركة Caktuss بنفس الفكرة! وقتها قولتلهم: “ياااا أسعدتوا قلبي”، وحسيت إن الوقت جه نعيش اللحظة دي تاني.
قررت أجمع أجمل فريق العمل، وكنت متأكدة إنهم مشتاقين لـ”شوف بقلبك” قد ما كنت أنا مشتاقة….
شوف بقلبك” مش مجرد أغنية، دي حالة بتتجدد وبتكبر مع كل شخص بيؤمن بيها وبيدعم رسالتها! 
شكراً لكل واحد ساهم في نجاحها، وشكراً لكل حد شافها بقلبه قبل عيونه؛ شكراً من قلبي لكل شخص كان جزء من الحلم ده.

المشاركين فى اعلان اهل مصر 

 نسمة الشاذلي-، من أول ما كلمتها كانت إجابتها بحماس “يلا” من غير تفكير، وبكلماتها قدرت تحول الفكرة لرسالة حقيقية تمس القلوب وتوصل لكل حد سامعها. 
هشام خرما، رغم انشغاله بتحضير Event ضخم، قال بحماس كلمته “يلا بينا”!، وأبدع في لحن و توزيع مش مجرد موسيقى، لكنه روح للأغنية، ترجم كل كلمة لإحساس بيوصل للقلب فورًا. 
 هشام سليمان ال BOSS، اللي من سنين أنتج أول نسخة من “شوف بقلبك”، ورجع النهارده يكمل المشوار بنفس الحماس والإيمان بالرسالة، و بروحه وخفة ظله اللي بتملأ المكان بهجة.
 عمران وندى، اللي أحيوا من جديد حالة الحب والسعادة اللي اتخلقت مع الأغنية، وجعلوا الفكرة تكبر وتوصل لقلوب أكتر.
 المخرج أشرف حمدي ومدير التصوير أحمد كردوس، اللي أبدعوا في ترجمة كل إحساس في الأغنية إلى صورة مليانة حياة ودفء، وصلت لكل مشاهد بأقوى طريقة.

شكرا لكل النجوم اللي غنّوا “شوف بقلبك” وخلّوا رسالتها توصل لكل قلب! 
صوتكم مكنش مجرد لحن، كان نبض للأمل، للحب، وللحياة.. كل كلمة غنيتوها كانت مليانة إحساس، وكل نغمة حملت معاها رسالة بتلمس القلوب و تنقذ حياة مرضى الحروق.

 الفنانة يسرا  – حضورك كان سحر خاص، وصوتك الدافئ خلّى “شوف بقلبك” مش مجرد أغنية، لكنها إحساس يوصل للقلوب بدون استئذان، وجودك كان بمثابة رسالة حب وأمان لجميع مرضى 
و الناجين من الحروق.
 هاني الدقاق - كنت معانا من الأول بصوتك وإحساسك اللي بيملى أي عمل طاقة وحياة، ورجعت تاني بنفس الحماس و الروح الي بتميزك دايما.
 محمد الشرنوبي – رغم جدولك المليان قبل رمضان، إلا إنك جيت بكل حب، وقدمت أداء مليان إحساس ودفء، لإحساسك اللي لمس قلوبنا وقلوب كل اللي سمعوا "شوف بقلبك". 
 ياسمينا العبد، يوسف أشرف، شريفة العيوطي – أصواتكم كانت روح جديدة في “شوف بقلبك”! مش بس غنيتوا، لكن حطيتوا إحساسكم في كل كلمة، وجودكم وحماسكم خلى العمل مليان طاقة وأمل.

النجوم اللي شاركوا في “شوف بقلبك” مكنوش مجرد أسماء.. كانوا نبض حب وأمل لمس القلوب!  
كل واحد فيهم شارك بروحه، بحماسه، وبطاقة صادقة خلت الحلم يكبر قدامنا، والأهم من ده كله، قدام عيون الأطفال اللي شافوا الأمل لأول مرة بقلوبهم قبل عيونهم.

 شريف منير – حضورك القوي كالعادة خطف الأنظار، وإحساسك الصادق  دعموا رسالتنا بكل حب وتأثير؛ لعبك وضحكك مع الأطفال كانت لحظات حقيقية مليانة دفء وإحساس من القلب.
 درة، شيرين رضا، داليا البحيري، نهال عنبر- تواجدكم بالمستشفى كان مليان دفء وحب وصل للقلوب قبل الكلمات، و ابتسامتكم كانت شعاع نور في كل مشهد.