عمرو وردة: عارف بلاوي عن حجازي بس هو راجل متجوز وعنده أولاد وأنا مش هأذي حد
كشف اللاعب عمرو وردة عن تفاصيل جديدة تتعلق بإحدى الأزمات التي أُثيرت حوله في السابق، مؤكدًا أن ما يُتداول عنه لم يحدث، وأنه يدافع عن نفسه لقول الحقيقة، وليس للتهرب من المسؤولية.
أزمة عمرو وردة مع أحمد حجازي
وقال وردة خلال لقاء على قناة المشهد: «ربنا بيستر طبعًا، ودي نعمة، بس اللي اتقال عني ما حصلش، ولو كان حصل كنت رحت وكان هيبقى عندي مشاكل كتير.. أي بني آدم طبيعي ممكن يغلط، وأنا لو غلطت كنت هقول أنا غلطان، وسوري».
وتطرق وردة إلى علاقة اللاعب أحمد حجازي بالموقف، موضحًا أن الأخير كان في البداية داعمًا له، ثم غيّر موقفه لاحقًا، مضيفًا: «حجازي كان واقف معايا في الأول، وبعد كده غير رأيه.. أنا معرفش ليه.. يمكن شاف إن الموضوع فيه تفاصيل كتير».
ورفض وردة الدخول في أي تفاصيل شخصية تخص حجازي، مشددًا على احترامه له، قائلًا: «عارف عنه بلاوي بس هو راجل متجوز وعنده أولاد، وأنا مش هأذي حد.. مش في طبعي أتكلم عن ناس أو أضرهم، حتى لو في ناس بتحب تأذي غيرها، أنا مش منهم.. مش كل حاجة الناس تسمعها تبقى حقيقية، وفي حاجات بتتقال وتُفهم غلط.. أنا بدافع عن نفسي مش علشان أبرر، لكن علشان أوضح الحقيقة».
عمرو وردة يتحدث عن أخلاق أبوتريكة
في سياق آخر، أشاد لاعب كرة القدم عمرو وردة بزميله السابق محمد أبو تريكة، واصفًا إياه بـ«أنضف شخصية تعاملت معها في مسيرتي الكروية»، مشيرًا إلى أن أبو تريكة كان يتمتع بأخلاق رفيعة وروح تضامنية قلّ نظيرها.
قال وردة: «أبو تريكة شخصية محترمة وحقانية، كان دائمًا مباشرًا وصريحًا مع الجميع، وبيساعد الناس بطريقة غير طبيعية، والله العظيم، كنت أشوفه في غرفة الملابس يساعد أي حد محتاج من غير ما يطلب».
وأضاف: «وكان بيشتري أحذية وأجهزة آيباد للاعبين الناشئين من جيبه الخاص، وده لأنه بيحب الخير وبيحب يفرّح الناس.. وكان في لاعيبة ناشئين ما كانوش يقدروا يشتروا مستلزماتهم، فكان هو يتكفل بيها بدون ما حد يطلب».
وأشار وردة إلى أن أبو تريكة كان قدوة في الالتزام والانضباط، مؤكدًا أنه تعلم منه الكثير خلال فترة تواجدهما معًا، مضيفًا: «أنا عمري ما غبت عن تمرين، وأتحدى حد يقول إني قصرت، لكن في ناس بتحب توقع غيرها.. للأسف مش كل الناس زي أبو تريكة»، مؤكدًا أن أبو تريكة ترك أثرًا طيبًا في كل من تعامل معه.
وتابع: "الفرق كبير بين حد ملتزم وزي أبو تريكة، وحد تاني بيدوّر على إنه يوقع الناس.. هو من الناس اللي فعلاً بتسيب بصمة جوه الملعب وبرا الملعب».
