كسـ ر اللمبة بإيده.. محامي يكشف الموقف القانوني لشاب القطار
ضجة كبيرة أثارها مقطع فيديو متداول لشاب مصري صوّر نفسه داخل أحد القطارات الروسية الجديدة وهو يتعمد كسر لمبة بيده، وسط تلفظه بألفاظ خارجة. الفيديو انتشر كالنار في الهشيم، وخلّف موجة غضب على السوشيال ميديا، بسبب سلوك الشاب اللي وصفه البعض بـ"المستفز"، مطالبين بمحاسبته قانونيًا علشان يكون عبرة لغيره من مَن يتعدى على المال العام دون رادع.
مراسل "نيوز رووم" تواصل مع المستشار القانوني صابر القاسمي، للوقوف على الموقف القانوني للواقعة، فقال:
"ماحدث يُعد تخريبًا متعمدًا في المال العام، ويقع تحت طائلة القانون وفقًا للمادة 162 من قانون العقوبات، اللي بتعاقب على الإتلاف العمدي لممتلكات الدولة. وكمان ممكن يواجه تهمة السب العلني لو الفيديو فيه ألفاظ نابية موجهة للمجتمع أو جهات رسمية".
وأكد القاسمي أن سلوك الشاب لا يمكن تبريره بأي حال من الأحوال، قائلاً:
"حتى لو صغير، فيه حاجة اسمها مسؤولية جنائية. التصوير ونشر الفيديو بيفيد القصد الجنائي الواضح، يعني هو عارف بيعمل إيه، ومش هزار".
وأشار المستشار إلى حادثة مرّ بيها شخصيًا، لما ضاعت تذكرته في القطار واضطر يدفع غرامة رغم أنه كان جالس في مكانه، وقال:
"احنا بنتعامل مع مرافق حديثة الدولة صرفت عليها مليارات، ومن غير وعي المواطن، كل ده ممكن ينهار".
وسرد واقعة شهيرة تعرّض فيها سائق قطار المنصورة لفقدان عينه بسبب رشق القطار بالحجارة، مؤكدًا أن التخريب مش جديد، لكنه بيزيد، والكارثة إن بعضه بقى موثّق بالفيديو وبقصد الشهرة!
واختتم حديثه:
"القانون واضح، والعقوبة لازم تتنفذ. كل مرة نقول معلش، بيزيد عدد اللي بيخربوا، ولازم يتحط حد ونطبّق العقوبة علشان البلد تفضل واقفة على رجليها، ومش معقول نسيب كل إنجاز يتحول لركام بسبب شاب مستهتر".
