سارة وفيق ترد على انتقاد طارق الشناوي لريستارت : لم تستخدم أدوات النقد
ردت المخرجة سارق وفيق على انتقادات طارق الشناوي لفيلمها ريستارت، الذي يقدم بطولته النجم تامر حسني، ويُعرض حاليًا بدور العرض السينمائي، ضمن موسم أفلام عيد الأضحى الجاري.
سارة وفيق ترد على انتقادات طارق الشناوي لفيلم ريستارت
وأعربت سارة عن استيائها من طريقة نقد طارق الشناوي للفيلم، حيث كتبت عبر حسابها على فيسبوك : "أستاذ طارق الشناوي في فرق كبير بين الإهانة وبين النقد .. حضرتك بتقول إن مفيش موضوع في الفيلم .. ودي حاجة ضحكتني جدًا لأن احنا بنتكلم عن موضوع الساعة موضوع العصر .. أكبر موضوع بيهمنا ويخصنا حاليًا".
وأكملت : " كلامك فكرني بمشهد في الفيلم للفنان محمد ثروت وهوه بيقول أنا أعمل أي حاجة عشان أبقى تريند ( احنا خدامين التريند ) وسمع كلام الچوكر ( الفنان باسم سمرة ) اللي بيشتغل لأغراض ناس".
وتابعت سارة مهاجمة طارق الشناوي، حيث كتبت : "مبروك يا أستاذ طارق .. عرفت تبقى تريند من غير ما تنقد الفيلم .. تخبط في القائمين علي العمل بعيد عن العمل نفسه . ولا اتكلمت عن إيجابياته ولا سلبياته .. لا ههاجم أشخاص وبكده هطلع تريند بسرعة .. ده موضوع الفيلم اللي أنت مافهمتوش أصلا ولا هو جالك ع الجرح ؟".
وأضافت : "وعلى فكرة أنا كمان بعرف أعمل تريند .. وهنطلع تريند أنا وأنت .. بس أنا على حق وهمنشنك عشان تظهر بسرعة .. انت بتقول إن أغنية المقص عجبتك بس هي مش داخل الفيلم .. لا يا أستاذ طارق الأغنية في الفيلم بس شكل اللي بيمليك اتلخبط".
وأكملت سارة : "ادخل شوف الفيلم اللي أنت مشوفتوش وأحكم عليه بنفسك وبلاش الأفكار السطحية اللي بتقولها على كل الأفلام .. لأنك لو شوفت ريستارت فعلاً كنت هتعرف أن قصته أهم ما فيه .. وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني .. ياريتك قولت حاجة نستفيد بيها بدال مأنت طالع ترمي إفيهات وإفيهات وحشة كمان".
سارة وفيق تؤكد نجاح فيلم ريستارت
كما أشارت المخرجة سارة وفيق إلى نجاح فيلم ريستارت، مستشهدة بإيراداته في شباك التذاكر، حيث كتبت : "الرقم اللي متحقق جوه مصر وبرا مش مجاملة يا أستاذ طارق .. ده الجمهور الحقيقي اللي بنخاطبه دول مش ولاد اختي مثلاً .. الفيلم لسه نازل وداخل علي خمسين مليون داخل مصر فقط ودا نجاح مفرح كل صناعه الحمد لله .. على العموم دي كلمتك ورأيك والجمهور قال كلمته برضو".
ماذا قال طارق الشناوي في انتقاده لفيلم ريستارت ؟
وكان قد وجه الناقد الفني طارق الشناوي مؤخرًا انتقادات حادة لفيلم "ريستارت"، مؤكدًا أن العمل يفتقر للرؤية الفنية والإخراجية، واصفًا التجربة بأنها لم تحمل أي تطور يُذكر في مسيرة أبطاله أو صناعه، رغم ما يتمتعون به من شعبية جماهيرية واسعة.
وقال طارق في لقاء له عبر برنامج "ET بالعربي"، أن تامر حسني – من الناحية النظرية – ابتعد بالفعل عن مهام التأليف والإخراج في فيلم ريستارت، وهو ما قد يبدو تطورًا إيجابيًا في مسيرته، لكنه أضاف أن الواقع العملي يقول غير ذلك.
وتابع الشناوي : "تامر كان حاضرًا بفكره وتفاصيله الفنية في كل مشهد من مشاهد الفيلم، ما يعني أنه مارس دورًا إبداعيًا أقرب إلى السيطرة الكاملة على محتوى العمل، حتى وإن لم يُنسب إليه رسميًا.
وأضاف طارق الشناوي بنبرة نقدية واضحة:" الفيلم لا توجد به رؤية، ولا إضافة، ولا مخرج بالمعنى الحقيقي، أنا محستش إن سارة وفيق أضافت أي شيء يُذكر، ولو شلنا اسمها من التتر وحطينا بدلًا منه (إخراج تامر حسني)، مش هنلاحظ أي فرق حقيقي، لأنها لم تستخدم أدوات المخرج، وكل اللي شفناه حوارات كوميدية فيها استظراف ومبالغات، والمخرجة سايبة الممثلين يتصرفوا بحرية مفرطة من غير ضبط إيقاع".
وفي تعليقه على أداء تامر حسني، أكد الشناوي أن الفنان يعتمد في اختياراته على "سلاح الأرقام"، أي النجاح التجاري، مؤكدًا أن هذا النجاح لا يعني بالضرورة قيمة فنية عالية.
وأكمل : "لو حد قال لتامر يسيب التأليف والإخراج لناس تانية، هيرد بالأرقام ويقولك فيلم (بحبك) اللي هو ألفه وأخرجه عمل أرقام، لكن ده مش مقياس. لو جاب مريم نعوم، أو شريف عرفة، أو مروان حامد يشتغلوا معاه، كان هيدخل دايرة تانية تمامًا".
