أحمد العوضي عن مقارنته بمحمد رمضان في مسلسل فهد البطل: مش عامل دور الأب كنمَرة أو استعراض

رد الفنان أحمد العوضي على مقارنته بمحمد رمضان بسبب ظهوره في دور الأب وابنه ضمن أحداث مسلسله الجديد فهد البطل، الذي يُعرض حاليًا في الموسم الرمضاني 2025.
 

وقال أحمد العوضي في برنامج الراديو بيضحك: أنا مش بحب أرد على أي نقد قبل ما الموسم يتعرض، لأن الشغل هو اللي بيرد. فكرة إنّي أرد معناها إن الشخص بيغلط فيّ، لكن الحقيقة إن دي مجرد وجهة نظر، حتى لو كانت سابقة لأوانها.

مش عامل دور الأب كنمَرة أو استعراض

وأضاف أحمد العوضي: شخصية حماد  الجارحي في مسلسل فهد البطل لها صفات معيّنة: شخص قوي، مهيب، صوته أجش، وملامحه حادة، وكل ده بينطبق على العبد لله. أنا مش عامل دور الأب كنمَرة أو استعراض، لكني عامله بشكل معيّن علشان يربط الجمهور بالشخصية.

وتابع العوضي: دور الأب موجود في حلقتين كاملتين، فإزاي حد يقول إنه داخل يتفرج على أحمد العوضي، ومش هيشوفني غير حلقتين؟! أما فكرة موت الشخصية والتأثير العاطفي اللي بيحصل بعده، وده تكنيك موجود في كل دول العالم، واتعمل من زمان. نور الشريف في الظالم والمظلوم ويحيى الفخراني عملوه في المرسى والبحّار، وصلاح السعدني في أرابيسك، وهي حاجة بتتلجأ ليها لأسباب درامية، مش حاجة وحشة، وبدليل إنها نجحت والمسلسل كسر الدنيا في أول حلقتين.

وأكمل أحمد العوضي: الانتقاد قبل المشاهدة مش منطقي، ولو النقد جاي من الناس اللي بتحبني بسمع لهم، لأنهم ممكن يلفتوا نظري لحاجة أنا مش واخد بالي منها وأعدلها. لكن النقد اللي مش من محبيني، مش بيلفت انتباهي ولا بيشغلني، لأن تركيزي الأكبر على الناس اللي بتدعمني وبتحبني