مديحة حمدي: ضحيت بشغلي واشتريت الآخرة.. وملتزمة بحجابي لأكثر من 30 سنة|خاص

أعربت الفنانة مديحة حمدي عن استيائها الشديد من الانتقادات التي تعرضت لها بعد حضورها جنازة الفنانة سميحة أيوب، حيث انتقد البعض ظهورها بحجاب غير كامل أظهر جزء من شعرها.

وأكدت مديحة حمدي في تصريحات لـ نيوز رووم، أن علاقتها بالفنانة الراحلة سميحة أيوب كانت علاقة وطيدة، حيث كانت بمثابة أمً لها، وهو الأمر الذي جعلها تهرول مسرعة لحضور الجنازة دون أن تلتفت لمظهرها.

وقالت مديحة حمدي مستنكرة: “سابوا جوهر الموضوع الأساسي اللي لازم نتكلم فيه، وإننا فقدنا قيمة كبيرة بوفاة سميحة أيوب، التي تعتبر الهرم الرابع، وكانت مشرفة مصر وبدخل عملة صعبة للبلد لأنها بتسافر بأعمالها المسرحية لأوروبا والدول العربية، وحاصلة على وسام النيل، واتكلموا على حجابي؟”.

وأضافت مديحة حمدي: “أنا وسميحة لم نكن مجرد أصدقاء، هي كانت أمي وأختي وأنا بنتها وأمها، وكانت صندوقي الأسود وأنا صندوقها الأسود.. عشنا مع بعض أحزان وأفراح، أنا لو جالي خبر وفاة أمي، هجري باللبس اللي كنت قاعدة  به وهشد طرحة على راسي.. مفيش وقت أقف قدام المرايا وأثبت الطرحة بالدبابيس”.

وتابعت مديحة حمدي: “اللي في إيدي مكانش مانكير دي حنة، لأن مع الكبر الضوافر بتصفر، وكنت رايحة وأنا لابسة حزام على ضهري لأن الدكتور مانعني من الحركة، متسائلة: “أنت بتكلمني في إيه علشان شعرتين بانوا من الطرحة يبقى أنا كده شيلت حجابي؟، أمال لو من غير طرحة خالص كنتم هتعملوا إيه؟".

مديحة حمدي: أنا أكتر فنانة اتكرمت كأم مثالية

وأكملت موجهة رسالة لمنتقديها: “أنت مش عارف تاريخي ونوعية الأعمال اللي بقدمها والمؤتمرات اللي بحضرها، أنا أول لقب اتقال عني الفنانة المحترمة وليا الشرف، وأنا أكتر فنانة اتكرمت كأم مثالية وكفنانة ملتزمة والفنانة الوحيدة اللي خدت جائزة الدولة التشجيعية في جيلي وإلى آخره.”.

وأكدت، أنها كانت حريصة على حضور الغسل والتكفين لأن سميحة أيوب لم يكن لديها ابنة، مضيفة: “كلموني عن عشرة خمسين سنة، سافرنا واتعذبنا وعملنا كل حاجة مع بعض، وهي خدمتني في حياتي، وأنا كنت بنام تحت رجليها لما كانت عندها مشاكل، كنا أكتر من الأصدقاء والأقارب، هي عوضتني عن أمي، كل ده تنساه وتتكلم في الحجاب”.

مديحة حمدي: أنا اشتريت الآخرة مش الدنيا وضحيت بشغلي

وأشارت مديحة حمدي أنها ترتدي الحجاب منذ أكثر من 30 عامًا، مضيفة: “الحمد لله أنا اشتريت الآخرة مش الدنيا.. وبسبب الحجاب مكانش بيتعرض عليا شغل، أنا ما ضحتش بالآخرة، لكن بالعكس أنا ضحيت بشغلي”.

وأكملت:" في حاجات كتير في حياتي محدش يعرفها، أنا لما قالوا لي جوزك هيتوفى بعد 6 شهور، كذبت عليه وقلت له أنا اعتزلت علشان محسسوش بحاجة، وقعدت خدامة تحت رجله".