انقسام حول انتقال زيزو للنادي الأهلي.. خيانة أم احتراف؟

بعد انتقال زيزو من نادي الزمالك للنادي الأهلي وتصريحاته النارية الفترة الأخيرة رصدت عدسة نيوز روم من الشارع آراء الناس ،وبين مؤيد ومعارض حيث اعتبرها  البعض صفقة ناجحة وخطوة قوية للاحتراف بينما رأي آخرون أنها بمثابة خيانة لنادي الزمالك وجماهيره وتباينت الآراء بين: "دي حاجة كويسة جداً إنه يجي نادي القرن حاجة ممتازة وزيزو  أكيد هيفيد النادي الأهلي في حجات كتير"

"والله كان نفسي من زمان زيزو يجي الأهلي لأنه ده مكانه إحنا خدنا منكو إمام عاشور وبن شرقي هي صفقة حراقة بجد علي نادي الزمالك ربنا يستر عليهم"

"دي حرية شخصية إنه يتنقل من فريق لفريق وأنا بحترم النادي الأهلي ده نادي كله نشاط وبيحضر لبطولات كتير وأنا أعترف بيه"

" كان ناس كتير شايفاه ابن النادي بس أول ماراح نادي الأهلي الناس شيفاه غلط، زيزو مكنش حد متوقع إنه يروح النادي الأهلي لكن هو فضل الفلوس علي الجمهور وكسر بنفس ناس كتير ،أنا شايف إنه مش هينجح في الأهلي أصلا"

"هو باع النادي وفكر في الفلوس"

"إحنا بنحبه، زيزو أفضل لاعب في التاريخ وهيبقي أفضل لاعب في الأهلي هيبقي عالمي وهيعمل كل حاجة في كأس العالم "

"هو أخد قرار مناسب علشان يحقق بطولات كتير هو مش باع النادي هو عايز يحقق بطولات هو لاعب موهوب وجامد جدا وأخد القرار الصح "

"أنا شايف إنه أخد القرار الصح هو بيلعب ف نادي كبير دلوقتي وبيشارك دلوقتي ف بطولة مهمة زي كاس العالم للأندية دي فرصة لاحتراف زيزو لأن النادي مقدروش زيزو كان النجم لنادي الزمالك لمدة 6 سنين، زيزو عارف مستقبله فين أكيد وهو مستقبله مع النادي الأهلي"  

"إحنا فرحانين ب الـ زيزو عمله شيء جميل وكويس إنه جه النادي الأهلي ودي ضربة قاضية للزملكوية"

وبين مشاعر الرضا والغضب تعتبر صفقة انتقال "زيزو" من أكثر الانتقالات إثارة في تاريخ الكرة المصرية الصفقة التي أثارت جدلاً واسعًا بين الجماهير، سواء من مشجعي الزمالك الذين اعتبروها "خيانة"، أو مشجعي الأهلي الذين يروا أن الصفقة  تعتبر إضافة قوية للنادي.
ويبقى السؤال: هل سينجح زيزو في إثبات نفسه مع الأهلي أم ستظل إنجازاته مع الزمالك هي الأبرز في مسيرته؟

وكانت  أول تصريحات زيزو بعد انتقاله رسميًا إلى النادي الأهلي، عبر أحمد مصطفى سيد “زيزو” عن موقفه من خطوة الرحيل عن القلعة البيضاء، مؤكدًا أنه لم يكن يومًا يسعى للرحيل عن نادي الزمالك في وقت سابق، وأن قرار رحيله جاء بعد دراسة وتفكير عميقين، خاصة في ظل تغير الظروف داخل ميت عقبة.

وجاءت تصريحات احمد سيد زيزو في برنامج قهوة فايق كالتالي :

** ما حدث لي في الزمالك كان مخططا له منذ عدة أشهر"

** في جلسة مع مجلس إدارة الزمالك قيل لي: اخرج وقل إنك أنت من ترغب في الرحيل"

**  في شهر أغسطس 2024 جالي عرض رسمي من نادي نيوم السعودي بـ 6.5 مليون دولار، وقتها مجلس إدارة الزمالك وافق وجمعتني جلسة معاهم، واللي وقف الموضوع وقتها إنهم قالولي اطلع قول للناس انك عايز تمشي عشان خايفين من الجمهور لأن كل قراراتهم مبنية على السوشيال ميديا قلتلهم مش هطلع أقول حاجة ده عرض عندك عايز توافق وافق مش عايز متوافقش براحتك

** مشاكلي مع الزمالك بدأت في آخر عام ونصف، ورفضت استغلال الشرط الجزائي في عقدي"

**  اتحجز لي تذكرة كشف طبي في الإمارات لعرض من نادي نيوم، وأنا مكنتش عارف أي حاجة عن الموضوع واتفاجئت بيه، ومش عارف هل النادي وافق عليه ولا لأ.

**  روحت النادي أنا ووالدي، وخدت ميعاد مع كابتن حسين لبيب، وفجأة قال إنه تعبان ومش هييجي النادي، وبعتلنا حسام المندوه بداله.

**  كلمته وقولت له:" جالي تذكرة حجز للكشف الطبي في الإمارات لعرض من نادي نيوم.' رد قالي: 'إيه دا؟ عرض إيه اللي بتتكلم عليه؟' قلتله: 'أومال التذكرة دي وصلتلي إزاي؟!

** أبويا اتشتم 8 أشهر ورفضت أرد على الإساءة، وراهنت على جمهور الزمالك إنه ميصدقش اللي بيتقال عليه ولكن كله بيكدب الكدبة ويصدقها

**أنا نفس الشخص اللي كان عقده فيه شرط جزائي، ومع ذلك رفضت أمشي. ولو كانت نيّتي في يوم من الأيام إني أسيب النادي، كنت عملت ده من بدري. نادي الريان القطري طلبني من سنين، وساعتها رفضت استغلال الشرط الجزائي في عقدي والرحيل واتمسكت بالاستمرار لنهاية عقدي

**من شهر يناير 2024 بدأت الأحداث. خلال الـ6 سنين اللي قضيتها في الزمالك، عمري ما عملت مشكلة مع حد، وكنت دايمًا بشتغل بإخلاص وفي صمت، ومحدش كان بيسمع عني غير في الملعب، لحد ما جه شهر يناير، وبدأ الموضوع يكبر وبدأت المشاكل. في يناير 2024 جالي عقد وإحنا في إفريقيا، وجالي عرض كبير من نادي الشباب السعودي بقيمة 6 ملايين دولار واترفض

** والله العظيم ما طلبت 100 مليون من الزمالك وقت التجديد وطلعوا وقتها في كل حتة يقولوا ده طالب 100 مليون وواحد من اعضاء مجلس الإدارة اللي المفروض يحافظ على السرية طلع على الهوا يقول زيزو طالب أكتر من 60 مليون بكتير رغم أن المفروض كان فيه جلسة تانية متحدد موعدها، هل طبيعي ده يحصل؟ الكلام كان حاجة ويقولوا زيزو أسطورة لكن الفعل كان حاجة تانية.