كسب ود الجمهور .. محمد سامي يفتح النار علي طارق لطفي

علق المخرج محمد سامي، علي تصريحات الفنان طارق لطفي عن الدور الذي تم عرضه عليه في مسلسل «كلام على ورق»  خلال برنامج حبر سري مع الإعلامية أسما ابراهيم .

وقال  «سامي» في بيان صحفي: «رد على كلام طارق لطفي المنتشر اليومين دول، أولأ طارق ممثل محترم وإنسان جميل واشتغل معايا توين، في مسلسل «مع سبق الإصرار، ومرة ​​تانية في مسلسل «حكاية»،  وأعتقد أن الدورين كانوا محترمين جداً وحققوا نجاحاً مهماً، وبعدها عرضت عليه دور في مسلسل «كلام على ورق» وحصل خلاف إنتاجي على الأجر تقريبًا، وعلى مساحة الدور، وعمل الدور ساعتها الراحل الجميل الأستاذ حسين الإمام والكلام ده سنة 2014 يعني من 11 سنة».

تابع :«فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد شاذ جنسيًا، وبدأ يتكلم عن المجتمع والناس وخوفه على الجمهور وكلام غريب جدًا بحالة من المبالغة والاسترسال لكسب ود الجمهور واللعب على الحالة الدينية والمتحفظة عند الجمهور العربي، ولكن فاته حاجة مهمة إنه بيتكلم عن دور في عمل مصور وموجود والناس تقدر تتفرج عليه».

كلام مُختلق وغير صحيح

وأضاف خلال حديثه في برنامج «حبرسري» :"«مش فاهم طارق قال كده ليه واخترع الموضوع ده إزاي وكمان عمل حكاية غريبة جدًا أنا مش فاهمها، وإنه خاف على عيلته وأسرته وطلعني بروَّج لشئ غريب جدا، أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد، لأن لو طارق عنده عيلة فأنا كذلك».
واكمل :« ومع احترامي ليك يا طارق كلامك مختلق وغير صحيح، والدور موجود ينفع الناس تشوفه، وكان حسين الإمام رحمة الله عليه طالع بيحب روجينا، وهي حبيبة عُمره وأنتيمه ماجد المصري وأحمد زاهر وأشرف زكي».

واختتم محمد سامي، حديثه عن دور طارق لطفي في المسلسل: «كان جدع مايع وصاحب كباريه وده اللي كان عاجبك في الدور وعملت معايا بروڤة أداء عليه وعلي مياعته وكان عاجبك، راجع نفسك يا صديقي قبل إلقاء قنابل تزعل زميلك منك، ومعلش إني رديت بالشكل ده ولكن لا بد من الرد للتوثيق، كلامك كان لازم يترد عليه وكل سنة وأنت طيب وأسرتك الكريمة بخير ولو أنت ترفض تقديم دور الشاذ فأنا قبلك أرفض أخرجه».

تصريحات طارق لطفي : 

وكان طارق لطفي، أعلن عن سبب عن سبب رفضه تجسيد دور "الشاذ" في مسلسل "كلام على ورق" للمخرج محمد سامي.. وقال في حواره مع الإعلامية أسما إبراهيم، في برنامج "حبر سري" المُذاع عبر قناة القاهرة والناس: "رفضت الدور بسبب عائلتي، أنا كنت موجود من البداية قبل كتابة ورقة واحدة من المسلسل، وكنت ببني الشخصية مع محمد سامي بطريقة مختلفة، إن هذا الشخص مش شاذ، لكنه يمثل الحكاية دي لأنه صاحب كبارية وبسبب طبيعة وظيفته".