خالد صلاح: خاصية AI Overview تهدد نموذج الصحافة في العالم
حذر الكاتب الصحفي خالد صلاح، من خاصية " AI Overview" بالذكاء الاصطناعي، التي تظهر فوق نتائج البحث، وتعطي معلومات مغلوطة، وصور غير صحيحة للقاريء، مما يقلل من زيارات المواقع الصحفية.
وكتب خالد صلاح في منشور له عبر صفحته الرسمية على "فيسبوك"، قائلًا: "خدوا بالكوا من اللي بيحصل دلوقتي في جوجل، بسبب حاجة اسمها AI Overview، اللي بتظهر فوق نتائج البحث، دي خاصية بتستخدم الذكاء الاصطناعي، علشان تديك الإجابة على سؤالك، من غير ما تدخل أي موقع، يعني بدل ما المستخدم يضغط على رابط، ويدخل يقرأ من مصدر صحفي، أو موقع إخباري، بياخد الرد على طول من فوق، مختصر وجاهز".
خالد صلاح يحذر من خاصية AI Overview
وأشار خالد صلاح إلى أن المشكلة ليست في الحصول معلومات مغلوطة فقط، بل الكارثة أكبر من ذلك، قائلًا: "جربت أكتب رئيس تحرير الأهرام، والنتيجة قالت ماجد منير، ودة حقيقي، لكن جوجل عرضت صورة علاء ثابت اللي مش في هذا المنصب حاليًا، يعني لو حد مش عارف مين دول هياخد معلومات خطأ، وصور خطأ دون تحقق".
وتحدث خالد صلاح: "القضية ليست في الأخطاء والتضليل، والأخطر إن المواقع اللي تعبت وكتبت المعلومات والأخبار ونشرت الصور، والمفروض إن لها حقوق ملكية فكرية مش هتاخد حقها، يعني الإجابة السهلة اللي بتطلع دي هتقلل الزيارات والقراءات، من المواقع الأصلية، وبالتالي تقلل عائد الإعلان على المواقع، وده معناه ضرب مباشر في مصدر الدخل الأساسي، لأي مؤسسة صحفية رقمية".
وتابع "حضرتك مش محتاج أقولك، إن ده بيهدد نموذج الصحافة كله، و فيه تقارير من مؤسسات دولية، بتقول إن بعض المواقع فقدت ما يقرب من 30% من زياراتها بسبب الخاصية دي، ده غير إن google نفسها بتستخدم محتوى من المواقع، من غير ترخيص أو احترام للملكية الفكرية".
وأضاف "إزاي الصحف تفضل تشتغل وتنتج وتدفع مرتبات لمحررين وصحفيين، وفي الآخر الذكاء الاصطناعي، ياخد المحتوى ويقدمه للناس على طبق من دهب بتواطؤ علني وغير قانوني من محركات البحث، ويضرب جوهر المعادلة المالية للصحف".
وكان الكاتب الصحفي خالد صلاح قد علق على صدور قرار غلق عددًا من المجلات الأمريكية الشهيرة، لافتًا إلى أن هذا المشهد يعكس موجة التراجع العنيفة التي تضرب الإعلام الورقي والرقمي التقليدي حزمة واحدة في العالم كله،ويأتي ذلك وسط تغيرات حادة في سلوك الجمهور، وتحولات كبرى في سوق الإعلانات التى أصبحت تفضل المحتوى القصير، التفاعلي، والموجه لجمهور مستهدف بدقة على منصات السوشيال ميديا العملاقة.
