محمد عطية: الحديث عن الانفصال في العلاقات ظاهرة مشينة

عبر الفنان محمد عطية، عن استيائه من الحديث عن الانفصال في العلاقات، على "السوشيال ميديا"، لأنها تقلل من قيمة الطرفين أمام الجمهور، لتفقد المعنى الحقيقي للعلاقات الشخصية، والتي تعني عدم تدخل الأهل.

أوضح الفنان محمد عطية، أن ظاهرة الحديث عن الانفصال في العلاقات، على "السوشيال ميديا"، ظاهرة مشينة و قميئة، قائلًا: "الحقيقة فكرة إن كل واحد بيجري قدام الناس، عاوز يثبت إنه الطرف الأفضل، وإنه المظلوم حاجة قمة في السخافة، كل المحاولات دية بتقلل من قيمة الطرفين في عيون الناس، والإيجو الذكوري طبعًا، ده ممكن نتكلم عليه سنة كاملة، اللي هو محاولات مستميتة لفكرة إن الرجل هو الطرف الأقوى و إنه ما اتسابش و إن الست اللي معاه دي مش تمام".

وأشار محمد عطية إلى أن الحديث عن الانفصال في العلاقات، عبر مواقع التواصل الاجتماعي، هو مادة خام للجمهور، لاحتقار جميع الأطراف، وللصحافة لزيادة "الريتش"، قائلًا: «الموضوع برمته حقيقي مقزز مهما كانت الدوافع، العلاقات الشخصية سميت شخصية عشان المفروض ما يتدخلش فيها أطراف تانية، حتى لو من الأهل، ما بالك بقى أمة لا اله الا الله تشارك الطرفين فضايح و خصوصيات، لا يجب أن تظهر للعلن بالمرة، شيء غريب جدًا الحقيقة".

وكان الفنان محمد عطية، قد انتقد سلوك الإنسان ضد الحيوانات وإيذائهم بشكل غير مبرر، مستنكرًا قتل أو تعذيب هذه الأرواح الضعيفة.

بشاعة غير مبررة

ووجه رسالة عبر حساب الشخصي بموقع "إنستجرام" قائلًا: "بحاول أفهم إيه سر تزايد البشاعة الغير مبررة مؤخرا تجاه الحيوانات، وليه ناس كتير بتبذل مجهود في قتلهم وتعذيبهم واذيتهم.. إيه المرض اللي انتشر وسطينا فجأة ده ؟".

وتابع: "ليه الاستقواء على كائنّات مش عاوزة حاجة غير بواقي أكلك وتسيبهم في حالهم و بيطيروا من الفرحة لو أديتهم شوية عطف.. ليه الموضوع بقى بالشكل ده ومن جميع الفئات و الطبقات.. إيه الحل؟".

سلوك عدواني

وأكمل: "وصدقوني اللي بيقتل حيوان أو بيعذبه لو اتحط في ظروف تانية ممكن يعمل ده مع البشر عادي.. كل اللي في إيدينا نصور ونفضح و نضغط ونطالب الداخلية بعدم التهاون بالأمر".

واختتم: "بس حقيقي الموضوع بقى مؤلم جدا، خصوصا مع الكلاب اللي بتفضل تثق في البشر رغم تكرار الأذى و التمادي فيه.. أنا مش عارف ليه أبسط الحاجات الآدمية بقيت بحس فيها بالعجز كده".