"مبجاملش ومشيت ابني".. رد ناري من ميدو على استمرار شيكابالا مع الزمالك
رد أحمد حسام ميدو، عضو لجنة التخطيط، بنادي الزمالك، على إمكانية استمرار محمود عبدالرازق، قائد الفريق الأبيض الموسم المقبل، وتراجعه عن الاعتزال.
قال ميدو في بوتكاست "خطين حمر": "اولا شيكابالا لسه في عقده موسم كمان يعني مش أنا قاعد معاك وبقول نجدد ليه موسم لا هو عقده لسه فيه سنة".
أضاف: "شيكابالا قعد 8 سنين في الزمالك ببلاش بدون ما ياخد جنيه بسبب أن كان في ناس بتقوله احنا بندفعلك فلوس غرامه سبورتنج لشبونه وفي الاخر مكنشي في حاجه ادفعت".
أكمل: "هل شيكابالا اللي شال الزمالك 7 أو 8 سنين ده كله لا يستحق أنه يتساب ليه حريه الإختيار في القرار يعتزل أو لأ".
وتابع: "والله العظيم وحياة ولادي أنا مفيش حد عندي في الدنيا عزيز اكتر من الزمالك وعمري ما جاملت حد على حساب الزمالك".
وأوضح: "أنا ابني علي، جوميز قال يتعمله عقد فريق أول، روحت قعدت مع جوميز وقولتله رأيك في ابني؟ قالي لاعب كويس بس ميقدرشي يلعب دلوقتي في الزمالك فريق اول محتاج وقت.. قولتله شكراً خدت عقد ابني ومشيت علطول رغم أنه كان محطوط ليه 2 مليون جنيه في السنة".
وأختتم تصريحاته: "عمري في حياتي ما اجامل حد على حساب الزمالك .. أنا خدت قرار أن صحاب عمري يمشوا من الزمالك وزعلوا مني جدا .. لكن أنا عملت اللي في صالح الزمالك وقتها".
