ننشر أقوال المتهم الأول بقتل صديقه بالطالبية بسبب خلافات بينهما
المحتويات
استمعت جهات التحقيق لأقوال المتهم الأول بقتل شاب الطالبية، وقال: اللي حصل إن يوم السبت الموافق 21 ديسمبر 2024، حوالي 3 ونص العصر، أنا كنت شغال في المحل بتاعي، ولقيت المجني عليه واقف قدام المحل بتاعي، وكان ماسك زجاجة خمرة في إيده وبيشرب منها، وأنا لما شوفته طلعت من المحل بتاعي وقولتله روح اشرب بعيد عن باب المحل علشان ده محل أكل عيش، وكده مش هيجيلي زباين غير ناس شبهك، راح هو قايلي يعني إيه شبهك دي وزقني وشدينا مع بعض وفضل واقف قدام المحل، وأنا سبته ودخلت أكمل شغلي وبعدها ببص على الباب لقيته مشي من قدام المحل.
وأضاف المتهم الأول بقتل شاب الطالبية في التحقيقات: على الساعة 9 بالليل في نفس اليوم لقيت المجني عليه رجع عند المحل ثاني وكان معاه صاعق في إيده، وكان في الوقت ده أخويا كان بيجيب حاجة من الشارع ولسه راجع، وهو داخل المحل علشان نكمل شغلنا راح المجني عليه كهربه بالصاعق في رجله، راح أخويا قاله إنت بتعمل إيه احنا مش هنلعب، ومفيش ما بينا تهريج وسابه ودخل المحل وهو زعلان، و المجني عليه مصمم يهزر معاه وراح كهربه تاني في صدره داخل المحل، راح أخويا شتمه وقاله اطلع بره یاض وزقه، راح المجني عليه شتمه.
اعترافات المتهم
وواصل المتهم الأول بقتل شاب الطالبية في اعترافاته أمام جهات التحقيق: أنا كنت بكنس المحل ولما سمعته بيشتم أخويا وأمي روحت ماسك المقاشة وضربته على دماغه وهو مسك راسه وقالي حلو الكلام ده انت واخوك بقيتوا تعرفوا تتكلموا طيب والله لوريكوا انتوا الاثنين، وطلع من المحل بتاعنا ووقف قدام المحل بس قصادنا من الناحية الثانية، وبعدها مشي من قدام المحل واختفى حوالي نص ساعة، وفي الوقت ده كان موجود زبون بحلقله لما شاف الموضوع كله طلع مطواه من جيبه وقالي خليها معاك علشان لو المجني عليه رجع اتخانق معاك ثاني.
وأكمل المتهم الأول اعترافاته في التحقيقات: أنا أخدت المطواه منه وحطيتها في جيبي وبعد شوية لقيت المجني عليه رجع تاني وقالي خد تعالى علشان أعاتبك في اللي حصل، وأنا قولتله ماشي وطلعت معاه وکنا ماشین مع بعض وقالي: عايز تقل مني في المنطقة وأنا بقوله يعني هو ينفع اللي انت عملته اللي انت عملته معايا غلط، إنك تكهرب أخويا وتشتمنا بأمي، وفي الوقت ده كان في واحد صاحبنا وأول ماالمجني عليه شافه جاي علينا قالي انت عارف إن أنا جايبك هنا علشان أقطلـ عك وشك وأموتك وراح ضاربني بالبونية في وشي، روحت أنا مطلع المطواة من جيبي وفضلت أهوش فيه ولما قرب عليا ضربته بالمطواه بس مش عارف أنا ضربته فين.
وأردف قاتل صديقه في الطالبية: في ناس كثير جت ولقيت أخويا واقف ومعاه خشبة في إيده وقولتله هاتها وبعدها أخذت أخويا ومشينا من نفس الشارع اللي جينا منه، وروحنا أنا وأخويا على المحل وبعدها خوفنا لحسن يجي يكسر المحل فقفلنا المحل ومشينا، وبعدها عرفت إن المجني عليه مات روحت واخد بعضي أنا وأخويا وطلعنا على البلد بتاعتنا في الشرقية، وتاني يوم أنا كلمت الضابط وسلمت نفسي وبعدها قالي أخوك فين وأنا قولتله أخويا معملش حاجة وقالي لازم يجي علشان الكاميرات جابته في الخناقة وأنا أخذت الضابط لحد البيت بتاعنا وطلعت جبت أخويا ونزلنا وركبت معاهم العربية وأخدونا على قسم الطالبية وهو ده كل اللي حصل.
وألقى رجال المباحث بقسم شرطة الطالبية القبض على المتهمين، وجرى اقتيادهما لقسم شرطة الطالبية، واعترفا بجريمتهما، وبعرضهما على النيابة العامة قررت حبسهما على ذمة التحقيقات، وتقرر إحالتهما للجنايات.
