زوجة عمرو السولية توجه له رسالة مؤثرة بعد رحيله عن الأهلي

وجهت هدير مندور، زوجة نجم خط وسط النادي الأهلي السابق عمرو السولية، رسالة مؤثرة لزوجها بعد رحيله عن القلعة الحمراء عقب مشوار حافل استمر نحو تسع سنوات، حقق خلالها العديد من البطولات والنجاحات مع الفريق.

وكتبت هدير مندور عبر حسابها بموقع انستجرام: " ٩ سنين بدأنا الحكاية سوا من اول يوم، فاكرة اول يوم تمرين ليك و فرحتك و إصرارك انك هتثبت نفسك و تثبت انك تستحق مكانك عارفة اد ايه مكنتش بتبخل بنقطة عرق و اد ايه بتشتغل على نفسك عشان تكون احسن و احسن، ارقامك و البطولات اللي حققتها مع النادي دي نتاج اخلاصك و اجتهادك و التزامك الغير محدود و الكل بيشهد بكده".
 

وتابعت:" ربنا يعلم انك كنت مثال للاحترام و الاخلاص و الاجتهاد طول السنين دي ٩ سنين و نص عشنا فيها ايام صعبة و ايام مكناش بنام من الفرحة بسبب إنجازات كتير انت شاركت فيها، ٩ سنين من عُمر ليلى اللي متعرفش غير انك اجمد لاعب في الدنيا و اللي قضت احلى ايامها معاك في النادي و بتشجعك و توجهك و تفرحلك و انت عمرك ما خيبت ظننا و دايما فخوريين بيك".

واكدت :" انا قولت عمري ما هتدخل في الكورة و اشجعك و اساندك بعيد عن الميديا بس من حقك عليا و علينا كلنا ان كل الناس تعرف اد ايه انت اكتر حد مجتهد و ملتزم و شخصية عمرها ما هتتكرر في مجال الكورة و اللي عاشرك و اتعامل معاك عارف كده كويس".

واختتمت :" عايزة اقولك اني انا و البنات فخورين بيك اوي اوي اوي و هنفضل طول العمر جمبك في كل خطوة ربنا يكتبلك الخير اللي في الدنيا دي كلها عشان انت تستاهل كل حاجة حلوة ربنا يوفقك في كل خطوات حياتك و يخليك لينا".

 عمرو السولية يودع جمهور الأهلي

وكان عمرو السولية، ودع  جمهور النادي الأهلي بكلمات مؤثرة، عقب رحيله عن القلعة الحمراء بعد رحلة دامت 9 سنوات، مؤكدًا فخره بما حققه مع الفريق، وامتنانه لكل من دعمه.

وكتب السولية، عبر حسابه بموقع انستجرام :" جمهور الأهلي العظيم، جاءت لحظة الوداع، اليوم أعلن إنتهاء مشوارى مع النادى الأهلي تسع سنوات ونصف منذ اليوم الأول لي داخل جدران النادى الأهلي كنتم الداعم لي فى كل لحظة وفى كل مكان ذكريات كتير عشناها مع بعض منها لحظات صعبة عدينا بيها سوا ولحظات الفرحة والتتويج بالبطولات ولحظات معرفناش فيها المستحيل".

وتابع السولية قائلا:"  فخور بما حققته مع النادى 342 مباراة سجلت 34 هدفا وصنعت ٢٩  وحققت24 ..  بطولة كل الشكر لجمهور النادى الاهلي وكل من زاملته داخل الملعب كل الشكر لكل فرد داخل المنظومة اليوم انتهت رحلتى مع النادى الأهلى..  الحمدلله عمرى ما قصرت ولا بخلت بنقطة عرق واحدة فخور بما قدمته فخور بالرحلة من البداية للنهاية أتمنى أكون أديت رسالتى على أكمل وجه هيوحشنى هتافكم ليا ( عمرو يا سولية بنحبك يا أبو ليلى).

واختتم السولية قائلاً:" رسالة أخيرة لكل عمال المهمات فى النادى الأهلى شكراً على حبكم على مدار تسع سنوات ونصف قضيت بينكم أحلى الأوقات واللحظات اللى كلها حب وأخوة،  فى النهاية كل التوفيق للنادى واللاعبين فيما هو قادم ، انتهت رحلة اللاعب رقم 17  مع الأهلي".