شيكابالا: اتدربت فى الأهلي بتيشيرت أبيض.. والزمالك يُحارب من الجميع
تحدث محمود عبد الرازق شيكابالا نجم نادي الزمالك، عن العديد من الملفات التي تخص نادي الزمالك في الفترة الأخيرة، وحقيقة توقيعه للاهلي في أحدى المواسم.
تصريحات شيكابالا
وقال شيكابالا في تصريحات إعلامية: "جوميز مدرب صايع كرة والزمالك خسر برحيله لأنه كان يجيد التعامل مع اللاعبين والمباريات الكبرى، وكانت تعليماته لنا بضرورة امتلاك الكرة في الملعب بدلًا من الجري ورائها وبذل مجهود أكبر".
واضاف شيكابالا: بعد رحيل جوميز، كان يجب التعاقد مع مدرب يلعب بنفس الطريقة لكن تم الاستقرار على جروس، وبسبب اختلاف طريقة اللعب حدث خلل في الفريق والدنيا وقعت، وواجهنا صعوبة في التأقلم مع طريقة اللعب الجديدة، واستغرقنا وقتا طويلا حتى بدأنا نفهم الأسلوب، لكن الزمالك بحاجة إلى مدرب يلعب كرة هجومية لأنها هوية النادي التي تربينا عليها منذ صغرنا، حيث أن الجماهير تحب الأداء الجيد وتحزن إذا حققنا الفوز بدون أداء، عكس إذا خسرنا ونحن نلعب بشكل جيد.
وتابع: الزمالك يتم محاربته من الجميع وكأنه يلعب في الدوري الإنجليزي، رغم أن الزمالك لا يملك إلا اللوجو وجماهيره، وعلى العكس فالجميع يساند الجانب الأخر ودا مش طبيعي، هل عايزين كرة قدم ولا فريق واحد هو الفائز دائمًا؟ إحنا نقفل الزمالك لو عايزين فريق واحد بس اللي بيكسب دايمًا.
على جانب أخر كشف شيكابالا حقيقة توقيع للأهلي مؤكدا: أنا بعشق الزمالك ولما رجعت من اليونان، مين في مصر كان يقدر يدفع الفلوس غير الأهلي والزمالك؟، ووقتها الزمالك استدعاني 5 مرات للنادي لكن المسؤولين كان بيقفولوا التليفونات علشان محدش يقابلني.
وواصل: الناحية التانية كان زن كل يوم إنهم عايزيني، وكانت أجمد فرقة وقتها في تاريخ الأهلي مع مانويل جوزيه، وأنا كنت بفكر بقلبي وإني عايز أكون في المكان اللي مرتاح فيه نفسيًا، لكن بعد خامس مرة بدأت أفكر بعقل، قررت إني هقعد مع مسؤولي الأهلي، ولما النادي فتحلي الملعب بالليل علشان أتمرن كنت لابس تيشيرت أبيض، ولما قعدت مع عدلي القيعي قولتله طيب لو الأهلي والزمالك بيلعبوا وأنا احتياطي والزمالك جاب جول فأنا غصب عني هحتفل ووقتها هبطل كرة، كان رده إني هحب الأهلي.
واستطرد: بعد ذلك ممدوح عباس كلمني وقال عايز تعمل إيه؟، ولما عرف إني عايز ألعب في الزمالك قالي خلاص تعالى واعتذرت للأهلي، وعلشان كده ممدوح عباس ليه مكانة في قلبي.
وأكمل: في ناس مش عايزة الزمالك يكون على الطريق الصحيح ويفضل جوا دوامة المشاكل، لأنهم عايشيين على دوامة المشاكل، سعيد بوجود ميدو وحازم إمام في الزمالك لأنهم ولاد النادي، وبيحبوه وعايزين يساعدوا النادي بجد ومش بيمثلوا ولا مستنين حاجة، بس بنلاقي ناس جوه النادي عايزين يكسروا اللي بيشتغل، والناس بتسمع عن الدوشة من برة ومحدش عارف اللي جوه النادي.
واختتم شيكابالا: ممدوح عباس بيعمل كل حاجة ومش بيقول، هو اللي بيساعد اللاعبين يسافروا يتعالجوا برة مصر ويقعدوا بالشهور، وبيدفع الغرامات علشان أمنية حياته يتفرج على الزمالك وهو بيكسب.
