بعد لايفات هبة تركي.. والدة شيكا: "دي كدابة وإبراهيم سايب فلوس تكفي بلد"

خرجت والدة اللاعب الراحل إبراهيم شيكا، عن صمتها، لتكشف تفاصيل صادمة عمّا تعانيه بعد وفاة ابنها، مؤكدة أنها لم تحصل على أي حق من ميراثه، بالرغم من تركه شقتين وسيارة ومبالغ مالية كبيرة.

جاءت تصريحات الأم، ردًا على ظهور أرملة نجلها على تطبيق "تيك توك"، حيث قالت إنها تعيش الفقر ولا تجد طعامًا لها أو لأولادها، وأنها "كانت بتشحت فلوس علاجه".

وفي تصريحات خاصة لموقع "نيوز روووم"، قالت والدة شيكا: "أنا عندي 70 سنة، ربيت وكبرت وسندت ابني طول عمره، كنت ببيع حاجات عشان أجيب له فراخ يروح بيها التمرين، وفي الآخر ملقتش حد يقولّي انتي فين. رجليا مولعة ومش قادرة أمشي، جاتلي جلطة وأنا تعبانة، وربنا شاهد. بقبض تكافل وكرامة، وعايشة في شقة إيجار بتاعة ابن العمدة، وبدفع ميه ونور وغاز وأكل وشرب. أجيب منين؟ أنا تعبانة ومش لاقيه حتى حق الكشف".

وتابعت والد شيكا: "ابني تعب وشقي وساب وراه شقتين وعربية وفلوس في البنك، وفين حقي؟ مراته قالت مفيش، وقالت كانت بتشحت فلوس علاجه، طيب فلوس ابني اللي كان سايبها وهو في المستشفى راحت فين؟ حتى لما طلبنا ريحة من ريحته، قالت مش هدّيكوا حاجة، حتى الشبشب رفضت تدينا إياه".

وأضافت: "هبه بعتّت للعزا 10 آلاف جنيه، وابني باع تليفونه واستلف من الناس وكملهم 30 ألف عشان يعمل عزا لأخوه يشرفه، فين كانت هي وقتها؟! إحنا اللي شيلنا كل حاجة، وهي بتقول ماكانش لاقي ياكل!".

وردًا على ما قالته أرملة ابنها، هبة، بأنها مديونة بـ25 ألف جنيه، وأن "كل شوية حد ييجي يقول أنا عاوز فلوسي"، قالت الأم: "كدابة! ابني سايب فلوس تكفي بلد، وميراث كبير، وبيتها مليان، وبتقول مديونة؟! ده كذب في كذب، وعلشان تضحك على الناس وتكسب تعاطفهم، لكن أنا مش هاسكت".

واتهمت الأم الفنانة وفاء عامر بأنها كانت قريبة من ابنها ومشجعة لأرملته: "كان بيقولها يا ماما، وشافتني وأنا في الدفنة، شكلي ما صعبش عليها؟ ما سألتش عني ليه؟".

وأضافت: "ابني وعدني يجيب لي بيت بدورين ويطلعني عمرة ويفتح ورشة لإخواته، لكن كله ضاع، ومرة جالنا وهو في المستشفى بصباعه حبر أزرق، اتبصم وهو تعبان، واخدوا كل حاجة".

ومن جانبه قال شقيق الراحل، خالد: "مرات أخويا بتطلع تقول ماكانش لاقي ياكل! طيب فين الشقتين؟ فين العربية؟ كان لأخويا عشرة مليون جنيه من بره، ما شوفناش منهم جنيه. والله ما أنا سايب حق أخويا. طلبنا حتى هدومه، قالت لا. طلبنا شبشبه، قالت لا".

وكشفت والدة شيكا أيضًا أن ابنها كان قد استلف من شقيقته حلق ذهب عند زواجه، وعند شراء حلق جديد بدلًا منه، احتفظت به زوجته، قائلة: "خدته وحطّته مع الفلوس في الخزنة، ورفضت تديه لبنته".

كما أكدت أن أرملة ابنها قدمت لها ورقة تنازل مقابل 50 ألف جنيه ورفضت التوقيع، وأضافت: "أثناء الزيارة ادّتني 500 جنيه! أعمل بيهم إيه؟ ده ابني اللي تعب وعرق، مش ابنهم".

واختتمت الأم حديثها: "أنا عاوزة حقي، وحق ابني، البيت اللي وعدني بيه. اللي حصل ظلم، وأنا مش هاسكت. ربنا موجود وهيحاسب الكل، وأنا واثقة إن الحق هيرجع، حتى لو بعد حين".

كما فجّرت الأم مفاجأة جديدة بقولها: "أهل مرات ابني ساكنين معاها إقامة كاملة، وأنا مرمية لوحدي، وكانت بتتصل بيا الساعة واحدة بالليل تقولي الحقيني، إبراهيم بيقول إني سرقته، تعالوا، ولما روحنا عرفنا إن والدها سرق فلوسه".